Zəminə marzon baste vəziyyətədə oqəte, bə əhali zulm kardeye.

Məlume ki, Az.R Vəziron Kabineti tono Operativə Ğərarqohi keşvərədə karantinə rejimi muddət tosə iyulə manqi 1 dıroz kardəşe. Zəminə marzon bastə vəziyyətədə oqətəşe

Bənə istisna holi , kali şəhrıvandon de Xarici Koon Vəzarəti icazə de zəminə marzi ovaşte roy bə xaric şe imkan  bə dast varde bəzınen. Bə ım səbəbən Boku Xarici Koon Vəzarəti bina və har ruj de odəmon ğal bedə. BBC muxbir bə həmonə vırə şə, əyo odəmon vəziyyət omutəşe.

Boku sakin Sahibə Allahverdiyeva votəşe ki, cərrahiyyə əməliyyati karde  ro bəpe bə İron bışo. Azərbaycanədə ım vey bohoy, əmo İronədə xeyli erjone. Bileti ğıymətən boho bıe səbəbiku de həvopeyma bə İron pəre imkan nişe. Omə ki, Xarici Koon vəziriku zəminə marzi ovaşte barədə  icazə bısəno. Maştə subh saat 6-ku omə nubə qətəşe, 13-minə odəme. Bey hələən nubə rəsəni. Haliyədə nubədə 180 nəfər heste.

Afağ Rzayeva isə çe Qəncəku omə. Hırdənış noxəşe. Bey əks mualicə səbəbiku çey səhhət həniən qıvonin bıə. Isət ey bə İron bə mualicə barde ro icazə se pidəşe. Imruj qirəm bey nubə nırəso, məcbure ki, bə şəv bımando, bo maşkinə nubə bıqəto.

Əzizə nomədə Bokujə sakininən bo muxbiri qəp jəşe ki, ıştə i qlə çəş İronədə mualicə kardəşe, nəticəş çok bıə, ısət əqlə cəşi mualicə karde ro bə İron şe pidəşe.

Məleykə xanimi isə bə muxbiri jıqo votəşe: “ Baləma, boçi niyo bıkəm ki? Az bə İron həm bə mualicə , həmən bo nuni ro şedəm. Tosə pandemiya çe İrono mol vardedəbim, de ticarət karde roy ıştə əğlonım perosniə, əvonım handovniə, bo əvonım kə sə, kəxıvand kardə. Bə koronavirusi qorə marzon dəbastışone, dərəsimon, nıştimon kədə. Isət həni ım mərəz ni, əmo zəminə marzon oj kardedənin, votedən de həvopeyma bıpərən. Məqər həvopeymadə virus bə odəmon sirayət kardedəni?”

BBC muxbiri bə kom səbəb zəminə marzi oj nıkarde dair bə Naziron Kabineti de telefoni vasitə pars doəşe, əmo əvon bey cəvob doeku imtina kardəşone. Naxçıvaniku isə bə Turkiyə bemaneə ovaşte mumkune, bımi ro hiç qıley icazə sənəd tələb bedəni. Im məlimat bə  muxbiri çe Turkiyə-Naxcıvan marzi Dilucu ovaştə məntəğəku votəşone.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.