Sentyabrə manqədə Şanxay həmkari təşkilotədə İroni uzviyət daimi bəbe.
Çinədə bıə İroni səforətxonə zinə elanış karde ki Uzbəkistonədə i minnə sazişi imzo bey bəpeşt, Şanxay həmkari ımsornə sori Səmərğəndədə bıə Sentiyabrə manqi iclosədə İroni uzviyət daimi bəbe.
Bə Fars aqentiyəti raporti əsos, İroni səforətxonə bəyoniyədə omə: Miladi 2023 minnə sorədə, Şanxhay həmkari təşkilati yolon iclosədə de ım təşkilati ğəroli təsdiğ bey vositə, İron İslam Respublika uzv bey vəziyəti daemi bəbe.
Bə Şanxay həmkari təşkilati i bey, Tehroni bə şərğ diyə kardey siyasəti icra beyədə, qıləy vey muhimmə amil bə hisob omeydə, ki bois bəbe de Şanxay həmkari təşkilati uzvon əcumlə Çin və Rusiyə, İroni rabitə və həmkarion hoston ko.
Həmçınin bois bəbe, Mərkəzi və Cənubi Asiyaədə bə İroni nıfuzi əlovə ko.
Çin ictimai elmon onemonon jintonədə,Rusiyə, şərği Avropa və mərkəzi Asiya mıtoliəon kompaniya koşınos, Yao Hironq de Qelobal Taymz votımonədə votışe: enerji və ticari baxşonədə İroni həmkari de Çin və mərkəzi Asiya əlovə karde vey nəfış bəbe.
Həmçınin Çini ictimai elmon onımonon jintonədə, Asiya və Afriqa mıtoliəon kompaniya təhğiğəkə, Yin Qanq, həminə barədə votışe: İron karde bəzne,məntəğə çand tərəfiyə təşkilatonədə vey nuhimmə rolış bıbu.
Şanxay həmkari qıləy dıvlətiyə beynəlxalğə təşkilate ki Miladi 2001 minnə sori İyolə manqi 15 minnə rujədə Ğəzaxıston, Çin, Ğığizıston, Rusiyə, Tacikiston və Uzbəkiston səmtiku təsis bıə be.
Miladi 2017 minnə sori Ğəzaxıstoni paytəxt, Astanə şəhrədə, ım təşkilati iclos bərpo bıə be, və Hindustan və Pakiston kişvəron, bənə ım təşkilati daimə uzv elan bıə, ısət İron həm Şanxay həmkari təşkilatədə pidəşe bənə damə uzv əlovə bıbu.
