Şəmxani: varid bıə əmniyyət, məntəğə kişvəron stabilə mənafe təminəkə ni.

İroni milli əmniyyət ali şura sərkatib votışe: xarıci kişvəron tərəfo varid bıə əmniyyət, məntəğə kişvəron stabil mənafe təminəkə ni.

Bə İrna raporti əsos, İroni milli əmniyyət ali şura sərkatib Əli Şəmxani, de Azərbaycan Respublika milli əmniyyət sərkatib "Ramil Osubov" vindemonədə, votışe: məntəğədə sulh iyən stabilətiku daim surət himoyə kardey, İron İslam Respublika vey muhimmə strateqiaonku qıləyni bə hisob omeydə.

İroni milli əmniyyət ali şura sərkatib ijən təsdiğış karde: bəpe mığət bıbəmon və icozə mədəmon ki sultə iyən deşmənon nizom bə 2 qılə kişvəri bıvəti rabitəon zərəl-ziyon varid kon.

Şəmxani bə 2 qılə kişvər iyən milləti vey nezə mədəni, dini, torixi iyən sivilizasiya mıştərəkə rişəon işorəş karde iyən de Azərbaycan Respublika rabitəon nığıləti iyən hevujəti, çı İron İslam Respublika xarıci siyasətonku vey muhimmə baxşonku bəyonış karde.

İroni milli əmniyyət ali şura sərkatib ijən bə sionist rejimi bevəcə koon iyən cinoyəton dəvomi işorəş karde ki de məntəğə əmniyyət strukturonədə nıfuz hədəfi əncom bəbe, iyən əlovəş do: məntəğədə sionist rejim bənə vey muhimmə noəmnəkə iyən cinoyətkor zıney bıdə ki ıştın de siyosi bıhranon və daxıli ictimai və iğtisodi bıhranon dim bə dime əmmo cəhd kardedə, deştə daxıli bıhranon bə məntəğə ovoştoniye voitə, ıştə daxıli təziğon kam bıkə.

Azərbaycan Respublika milli əmniyyət sərkatib "Ramil Osubov" həm bə İron və Azərbaycan Respublika sivilizasiya, mədəni iyən məzhəbi mıştərəkə məsələon işorəş karde iyən 2 tərəfiyə mınosibəton zumand kardeyro çəvonku bənə mislış nıbıə fırsət bə hisobış varde iyən votışe: məntəğədə ğoymə stabiləti iyən əmniyyəti mıvzo, 2 qılə kişvəri vey muhimmə məsələonin.

Azərbaycan Respublika milli əmniyyət sərkatib umudəvo be ki İroni milli əmniyyəti ali şura sərkatibi səfər bə Boku, 2tərəfiyə rabitəonədə muhimmə mərkəz bıbu iyən Tehron-Boku mınosibətonədə maneon peqəto.

Cımə rujədə, məntəğə və beynəlxalğ vey muhimmə məsələon barədə nəzəon mıbodilə kardey iyən de Azərbaycan Respublika rəsmi şəxson vindemoniro İroni milli əmniyyəti ali şura sərkatib, bə Buko varid bıə.