Boku hukuməti anti şiə şiddətinə hərəkəton ijən bino bıə
Ğərəboği 2 minnə canqi bəpeşt iyən Azərbaycan Respublikaədə sioniston nıfuzi hevuj bey həmzəman Boku hukuməti tərəfo anti şiə şiddətinə hərəkəton bə tojə mərhələ varid bıə.
Bə Tolışi Rədio raporti əsos, Mudafiə Xət nomo insonə həxonku mudafiəkə muəssisə yol Rəfəət Səfərof tojədən Azərbaycan Respublikaədə bıə anti şiə hərəkəton şiddəti barədə votışe: tojədən muşahidə bıdə ki Boku hukumət de muxtəlifə dəhşətin iyən beəxloğə hərəkəton vositə beqınohə dindaron təhğir kardedə və de be əsosə ittihomon əvoni dastqir və həbs kardə.
Əv votışe: əmə jığonə nohəxə hərəkəton vədə sukut karde əzı nimon, boçi ki jəğonə rəftoron hukmən məhkum kardənine.
Mudafiə Xət nomo insonə həxonku mudafiəkə muəssisə yol ıştə sıhbəton dəvomədə təkidış karde: de təəsufi Əliyevi dıvlət çı dindaron həx-huğuğiku mudafiəkə qırd dastəon iyən şəxsiyəton bə pesoxtə bıə məsələon mıttəhəm kardedə vəhol ımki kişvərədə beqınohə mısılmonon huğuği poymol bey muhimmə məsələy.
Ğeyd kardənine ki Azərbaycan Respublika hukuməti anti şiə tojə hərəkəton barədə ifşo bıə fakton bəpeşt Rəfəət Səfərofi təhdid kardəşone ki çəy şəxsi jimoni barədə şikil-filmoni muntəşir bəbe ki əlbətə əv ın təhdidiku nıtarseku xəbə dodə.
Mudafiə Xət nomo insonə həxonku mudafiəkə muəssisə rəis çı Boku hukuməti anti şiə tojə bevəcə hərəkəton barədə ifşoş kardə ki məmurun mısılmonə zoəon oləti səpe nıvıştə dini çiyon de zu pok kardən, bə məhbusə dindaron təcavuz kardən, əvoni be olət kəmeraon vədə oqəttən və de muxtəlif behəyoə rəftori əvoni təhğir kardən.
