Moskva avtomobili nımoyeşqoədə iştirok, İroni veyə texnoloqiya məhsulon nımoyeş doeyro qıləy fırsət

İroni ticarət, məədən iyən sənaye vəzir, Moskva avtomobili nımoyeşqoədə iştiroki, İroni veyə texnoloqiya məhsulon nımoyeş doeyro qıləy fırsət zıneydə.

Miladi 2022 minnə sori Avqustə manqi 22 tosə 25 minnə sori(Şəmsi 1401 minnə sori Mordadə manqi 31 tosə Şəhrivərə manqi 3 minnə ruj), Moskva beynəlxalğə nımoyeşqohon vırədə(Expo Centerədə) və 30 həzo metr nımoyeşqohə fəzoədə, iyən 18 qılə kişvəri miyono təğribən 600 qılə kəmpaniya iştiroki bino bıə.

Rusiyə ın nımoyeşqohədə, İron yeqanə kişvəre ki de 900 kvadratə metrəku vey nımoyeşqohə pabilioni və bə 1 həzo 700 kvadratə metr bıə qıləy saloni çəy ixtiyor ğərorış qətə ki beynəlxalğə nımoyeşqohon torixi mıddətədə, mislış bə ni.

Bə İrna raporti əsos, İroni sənaye, məədən və ticarəti vəzir, Sed Rıza Fatemi Əmin, Moskva avtomobil nımoyeşqohədə bə İroni iştiroki əhəmiyyəti işorə iyən əlovəş karde: vaxi İron İslam Respublika dron, oksiqen soxtey maşin və cərrohəkə roboti bə co kişvəron ixroc kardedəmon, ın İroni zumandəti nışonəy ki karde bəzne dınyoədə bə İroni zıney komək bıbu.

Fatemi Əmin bəyonış karde ki de Rusiyə ticarətədə, iğtisodi rabitə və həmkoəti vey əhəmiyyətışe ijən votışe: iğtisodi əloğəon bois bəbe 2 qılə kişvəri rabitəon vey mıhkəm bıbu, və de diğğət bə Russiyə texnoloqiya barzıti, avtomobili baxşon ya turbin və co qılə barzə texnoloqiya məhsulon bə ım kişvəri ixracat, İron İslam Respublika zumandəti qıləy nışonəy.

İroni sənaye, məədən və ticarəti vəzir ijən təkidış karde: de har qılə kişvəri ticorətədə lozime ki koon de yande həmohənq bıbun və həminə zancirə fəğət de ixracat iyən varid bey icod nibəbe, bəlkəm bəpe de mıştərəkə istehsol və mıştərəkə kəmpaniyaon təsis bey, mıhkəmə rabitəon icod bıbun.