Bə Azərbaycan Respublika Takayevi səfəri nəticədə 10 qılə həmkoəti sənəd imzo bıə.
Azərbaycan Respublika iyən Ğəzaxıstoni prezidenton muzakirəon oxoədə, 10 qılə muxtəlifə həmkoəti sənəd imzo bıə.
Bə Fars aqentiyəti raporti əsos, Ğəzaxıstoni prezident Ğasım Jamert Takayev, bə Azərbaycan Respublika səfəri çərçivədə de ım kişvəri prezident, İlham Əliyev vindemon və votımonış kardə.
Im vindemonədə, 2 qılə kişvəri yolon bə Azərbaycan Respublika iyən Ğəzaxıstani miyono stratejikə həmkoətion nuhimmə məsələon işorəşon karde iyən bə siyasi, ticari, iğtisodi, nəğliyot iyən tranzit, mədəni və bəşərdustanə rabitəon hevujəti mıvzoon diğğət kardən.
Im votımonədə, Azərbaycan Respublika iyən Ğəzaxıstani prezidenton ticari, iğtisodi həmkoəti muğaviləon stratejikə rabitəon hevujəti rabitəon nığıl kardey, Miladi 2023-2024 minnə soronro 2 qılə kişvəri diplomatiya təşkilaton miyono həmkoəti bərnoməon, Miladi 2022-2026 minnə soron həmkoəti bə inkişof rosniyero komilə bərnomə və həmmə baxşonədə rabitəon bə inkişof rosniye muğaviləon 2tərəfiyə surətədə imzoşon karde.
İşorə kəmon ki zinə və bə Azərbaycan Respublika prezidenti rəsmiyə dəvəti əsos, və bə qıləy rəsmiyə səfəri çərçivədə, Ğəzaxıstoni prezident bə Boku varid bıə.
Həminə səfəri çərçivədə, Takayev bə Azərbaycan Respublika prezident, Altin Ğiran nomo bıə Ğəzaxıstani dıvlətiyə vey barzə medal hədyə doşe.
Im medal bə ım illət bə İlham Əliyev doə bıə ki əv 2 qılə kişvəron miyono həmkoəti iyən dusti hevujətiro vey muhimmə roli ifoəkəy.
