Şanxay həmkoəti təşkilati sərkatib: ım təşkilatədə, İroni uzv bey sənəd imzo bıə.
Şanxay həmkoəti təşkilati sərkatib Janq Minq votışe: de diğğət bə Səmərğəndədə bıə Şanxay həmkoəti təşkilat, İron İslam Respublika varid bey, ım təşkilati uzv bıə kişvəron yolon, İroni təəhudon barədə qıləy notə imzo bəkan.
Holi hazırədə, Rusiyə, Hindostan, Ğəzaxıston, Çin, Pakiston, Tacikiston və Ozbəkiston Şanxay həmkoəti təşkilati kişvəronin. İron, Əfğanıston, Belarusiya iyən Monqolustan nəzorətəkə vəziyətədən.
Imsornə Sentiyabrə manqi 15 tosə 16 rujonədə ğərore Şanxay həmkoəti təşkilati yolon iclos bərpo bıbu.
Bə Tas aqentiyəti raporti əsos, Şanxay həmkoəti təşkilati sərkatib votışe: əmə ım təşkilati rəhbəronku intizorımon heste Şanxay həmkoəti təşkilat dəçikneyro İroni təəhudon barədə qıly notə imzo kon, və çən İron İslam Respublika bənə dəvardə və bəştə əlovə bey mınosibə təəhudon komil ko.
Janq Minq işorəş karde ki dəvardə sori iclosədə İroni uzv beyro Şanxay həmkoəti təşkilati səmtiku ğərolon qətə bıə ijən əlovəş karde: tojədən Belarusiya həm tələbış karde ki bə ım təşkilat əlovə bıbu, Şanxay həmkoəti təşkilat ım mıvzo dumoədəy əmmo etığadımon heste nəhayətədə Belarusiya həm ım təşkilatədə uzv bıbu.
Şanxay həmkoəti təşkilati sərkatib ıştə sıhbəton dəvomədə umidış do ki ım təşkilat, məntəğə əmniyyət və stabiləti oqətey, uzv bıə kişvəron mıştərəkə mənafe hevujəti həmçınin bə ədoləti iyən tədbirinə dınyo mudiriyəti sistemi icod bey komək kardeyədə vey muhimmə rolış bıbu.
Janq Minq ıştə sıhbəton oxoədə təkidış karde: Şanxay həmkoəti təşkilat qıləy ojə təşkilate və har qılə kişvər ki ım təşkilati prinsipon əncom bıdə, çəyku dəvət kardedəmon ki Şanxay həmkoəti təşkilatədə uzv bıbu.
