Az.R -ədə dızdiə əməlon şe-şe ziyod bedə

Respublika Daxili Koon Vəzarəti statistik məlumat dərc kardəşe. Məlum bedə ki, məmləkətədə dəvardə sori orəxnə 6 manqədə 4181 dızdiə əməl bə ğeyd sə bıə ki, ımən çe 2015-minə sori muvafiğ devrisə 25% ziyode. Boku şəhəri sakin Elmir Sadıxli bə "Azadlıq radiosu" votəşe ki, polis kamməbləğinə dızdiəti fakton bə ğeyd sedəni və əvoni təhğiğ kardedəni. Mustəğil ekspertonən ım fikri təsdiğ kardedən.

Əsil həğiğət isə vey qıvonine. Devalvasiya, həmən hokuməti çe behraniku beşe ro hiç qıley tədbir nıvinde nəticədə əhali quzəran bə səfalət hədd rəsə. Imən hırdə dızdiəti hadison miğdar xeyli vey kardəşe. Im hərəkəton ziyod be səbəbonədə qıleyən polisi ım fakton təhğiğ, dızdon bə məsuliyyət cəlb karde əvəzi çəvonku rışvə se, və əvoni sərbəst vadoye. Yəni polis ğıvvon ıştən bə ım dızdə əməlon şərait soxtedən. Bı barədə Respublika KİV-onədə kafi ğədər fakton hestin. Respublika Prokuror orğanonən bı fakton pape nıbe, ısət məmləkətədə jıqo qıley siyasi vəziyyət bə əməl vardəşe ki, Respublika huğuğ muhafizə orğanon ıştə Konstitusion vəzifon icra kardedənin. Çımiən nəticə dızdiəti və diqər cinayət əməlon şe-şe ziyod beədə ıştəni nişon dodə.

Hejo vəzifədaron arədən çanədə cinayəton  barədə fakton hestin. "Politika.az" nıvıştedə ki, bəzi qeneralon, nazir muavinon hestin ki, Ğərəboği canqədə iştirakşon bıə ni, əmo boştə soxtə muharibə veteran vəsiğə bə dast vardəşone, devləti qozəşt və muavinəton sedən. "Azadlıq.info"ən xəbə dodə ki, Azərbaycan Muəllimon İnstituti Qəncə filialədə soxtə diplom doəşone. Bə vaxtədə həmonə instituti rektor Aqiyə Naxçıvanli bıə, və bə həmonə diplomon ey ğol kəşəşe. İsət əv Milli Məclisi deputat, həmən bə Ailə məsəlon dair Komitə sədre. Hiç qıley devlət orğani ey norohət karde curətış rəsedəni. Jiqo məmləkətədə dızdiə əməlon miğdar əlbəttə ki, ziyod bəbe, hətto polisonən bey mubaşir bəben.