Azərbaycanıjə biznesmenon bə xarici məmləkəti iğtisadiyyati sərmoyə nodən

Bə Turkiyə və Qurcistani iğtisadiyyati investisiya noə məmləkəton arədə Az.R lider mevğeyədə mandedə. Bı həxədə dəvardə rujonədə Respublika İğtisadiyyat Vəzarəti sərdar Şahin Mustafayevi məlumat doəşe. Votəşe ki, tosə ısət çəmə respublika bə Turkiyə 9 milyard dollar sərmayə noəşe, prespektivədə ım rəğəmi bə 16-17 milyard dollar rosnie nəzərədə qətə bedə.

Bə Qurcistan Azərbaycan biznesmenon noə sərmayə miğdar isə 3 milyard 400 milyon dollar təşkil kardedə. Iştənən bə ım məmləkəton bardə investisiya orəxnə - devalvasiya bəpeştə soronədə həniən ziyod bıə. Az.R məmur-oliqarxon ıştə biznesi vətənədə ne, xarici məmləkətonədə təşkil karde, çəvon bə xalqi mənafe çanədə bietina munasibəti nişon dodə.

"Azadlıq.info" saytən xəbə dodə ki, Şaməxi və Haciğabul rayoni İcra hokumət 300 heyvandarə təssərufaton 50 həzo hektar zəmini çəvon dasto sedə. Im təsərrufaton soybonşon sədo kardə bə Rayon İcra Hokumət, əvoni məcbur kardedən ki, ərizə bınıvışton, ıştə zəminonku imtina bıkon. Im təsərrufatonədə 500 ailə deştə  üzvon ko kardedən, 200 həzosən vey mol-mələ oqətedən. İcra hokumətədə bə har təsərrufati rəhbəri cəmi 25 həzo mənot kompensassiya təklif kardedən ki, ımən çəvon mılkon həğiği ğıymətisən 20 kərə bə kame. Təsərrufati sərdaron  bə devləti rəhbəri vığandə muraciəton hiç qıley cəvob səşon ni. Imən ey nişon dodə ki, moldarəti təsərrufaton ım curə vılo karde hejo prezidenti bardə siyasəti tərkib hissəy.