İroni xarıci vəzarətxonə Avrasiya mudir de Tehronədə bıə Azərbaycan Respublika səfiri vindemon.

İroni xarıci vəzarətxonə Avrasiya mudir de Tehronədə bıə Azərbaycan Respublika səfiri vindemon iyən 2 qılə kişvəron miyono həmkoətion barədə de yande sıhbətışon kardə.

Bə İsna aqentiyəti raporti əsos, Tehronədə bıə Azərbaycan Respublika səfir Əli Əlizodə de İroni xarıci vəzarətxonə Avrasiya mudir Əlireza Həğiğiyan vindemon  iyən 2 qılə kişvəron rabitəon və məntəğə vey muhimmə məsələon barədə deyande votımonışon kardə.

Bə İron İslom Respublika ələyh, Azərbaycan Respublika rəsmi şəxson iyən mediyaon anti hərəkəton iyən siyoh nışo doey təbliğon dumoədə, çımiku bənav Tehronədə Azərbaycan Respublika səfir bə İroni xarıci vəzarətxonə vanq bıə be və bə Azərbaycan Respublika ali rəsmi şəxson ım ğeyri dustanə hərəkətonku, İroni norizoyəti elanış kardə be.

Azərbaycan Respublika səfir ım vəziyəti icod beyku ıştə təəssufi elanış karde iyən ğəror bıə vey rə ım məsələ barədə İron İslom Respublika etırozi bə Boku rəsmi şəxson bəvote.

Çımiku bənav həm İroni xarıci vəzorətxonə sıxənəvot, Nasır Kənani Çafi, Ermənistoniku İroni himoyədorəti barədə Azərbaycan Respublika prezident İlham Əliyevi sıxənon reaksiyaədə elanış kardə be ki : Tehroni prinsipi siyasət bə de həmmə hamsuyəon rabitəon hevujəti iyən çokə hamsuyəti əsose və ım bə ım məeno ni ki de co qılə hamsuyəon İroni rabitə çok ni.

İroni diplomatiya sıxənəvot Ğərəboği məntəğədə 2 qılə şimoliyə hamsuyə  dırozə daveon vədə və İron İslom Respublika prinsipi siyasət işorə iyən əlovəş karde: Tehron həmişə bə beynəlxalğə huğuği çərçivədə iyən həxi rioyət kardey əsos, Azərbaycan Respublika iyən Ermənistoni miyono bə sulhomizə daveon həlli və ərzi təmamiyyəti oqətey təkidış heste və Azərbaycan Respublika sərzəminon işğol bey məhkum və vey barzə stəhədə çəvon ozod kardeyku himoyət kardedə.