Kaspi dıyoədə əmtəə tranziti əlovə bey barədə, İron və Rusiyə muzakirə
İroni roy və şəhr soxtey vəzir və Rusiyə prezidenti məxsusə dəstyar, Kaspi dıyoədə əmtəə tranziti əlovə bey barədə muzakirəşon kardə.
İroni roy və şəhr soxtey vəzir, Mehrdad Bəzrpaş və Rusiyə prezidenti məxsusə dəstyar, İqor Loytin deyande vindemon və həvo, dıyo, reyls xəton, caddə və çand tərəfiyə nəğliyot baxşonədə həmkoətion inkişof doey və Kaspi dıyo royku əmtəə tranziti zərfiyətiku istifodə kardey barədə deyande votımonışon kardə.
Rusiyə prezidenti məxsusə dəstyar, İqor Loytin de İron İslom Respublika rəsmi şəxson vindemon və sıhbət kardey xoto, bə Tehron səfərış kardə.
Bə roy və şəhrsoxte vəzorətxonə raporti əsos, Mehrdad Bəzrpaş, de Rusiyə prezidenti məxsusə dəstyari vindemonədə, 2 qılə kişvəri miyono nəğliyot həmkoətion inkişof, 2 qılə kişvəri mənafe boisəkə zınəşe və votışe: tojə həmkoətion Kaspi dıyoədə bəpe bə 2tərəfə fəalə bəndəron zərfiyət diğğət bıbu.
Bəzrpaş ijən əlovəş karde: Kaspi dıyoədə kəştisoxteyro İron və Rusiyə təvafuğon vey muhimmin və Milodi 2022 minnə sorədə şimol-cənub beynəlxalğə koridori royku de Rusiyə tranziti iminnə şələ varid bey, karde bəzne nəğliyoti həmkoətion baxşədə vey muhimmə mıjdəvonəti bıbu.
Rusiyə prezidenti məxsusə dəstyar həm ım vindemonədə Rəşt-Ostoro reyls xətton royku Rusiyə heyəti əncom bıə vindemonon və koşınosi icloson barədə sıhbətış kardə və həmmə baxşonədə nəğliyoti həmkoətion hevujəti tələbış kardə.
