Çin və Rusiyə mudafiə vəziron bə hərbi həmkoəti hevujəti təkidışon kardə
Moskvaədə Rusiyə və Çin mudafiə vəziron bə 2tərəfi hərbi həmkoətion hevujəti və 2tərəfə mənafeku mıtəğabilə himoyəon təkidışon kardə.
Çini milli mudafiə vəzir, Li Şanqfo bə Rusiyə mudafiə vəzir, Serqey Şoyqo dəvəti əsos, Aprelə manqi 16 tosə Aprelə manqi 19 minnə ruj bə Rusiyə səfərış kardə.
Oxonə manqonədə ğərb, Çin və Rusiyə rabitəon nığılətiku ıştə niqəronəti nışoş do və çand kərə bə rusiyə siloh vığandeyro Çini cəhdon bəyonış kardə be.
Bə Çini Qelobal Taymz rujnomə raporti əsos, dəvardə rujədə, Moskvaədə Çini mudafiə vəzir, Li Şanqfo və Rusiyə mudafiə vəzir, Serqey Şoyqo de yande təvafuğışon kardə ki 2 qılə kişvəri prezidenton stratejikə rəhbəri jintonədə, Çin və Rusiyə miyono tojə dıvrədə həmohənqion dəvom peydo bıko.
Həmçınin 2 tərəf təvafuğışon kardə ki 2 qılə kişvəri yolon miyono muhimmə icma, komil surət icro bıbu və bə barzə səthədə nezə rabitəon oqətey, hərbi mıbodiləon mexanizmi çok kardey, hərbi xıdməton baxşədə həmkoətion hevujəti və qlobal və məntəğə stabi və əmniyyəti oqətey cəhd bıbu.
Im votımonədə Li və Şoyqo çand kərə təkidışon kardə ki 2tərəfi ərazi təmamiyyət və mənafeku himoyə bəkan.
