Ərdoğani çe sionist rejimi bə Ğəzzə həmləon təcili oqətey bıə təkid

Tırkiyə prezdent bə Ğəzzə tanqə sionist rejimi ərtışi həmləon təcili surət oqətey təkidış kardə.

Sionist rejim dəvardə 2 haftə mıddətədə, de həvo və rəket qıvonə həmləon vositə bə Ğəzzə tqanqə həmləş kardə iyən tosə ısət ım həmləonədə, 4 həzoku vey Fələstinıjon şəhid iyən 13 həzoku vey zəxmin kardəşe.

Dəvardə Seşəmbə şəvədə sionist rejim Ğəzzədə Əlməmədani noxəşxonə bombardımonış kardə bə çəy nəticədə,1000 nəfəriku vey Fələstinıjon ki çəvonku vey hırdən bin bəş şəhodət rəsəşone, ım hodisə dumoədə dınyo və məntəğə muxtəlifə kişvəron ıştə reaksiya nışo dodən.

İsraili hırdən əkıştə rejimi ım vəhşiyə hərəkət mısılmon iyən dınyo kişvəron səmtiku de hevujə məhkumon dim bə dim bıə əmmo ğərbi devləton sionist rejimiku himoyə kardey dəvomədə fəğət ğeyri əktivə bəyoniyəon muntəşir kardışone.

Bə Anatoli aqentiyəti raporti əsos,zinə cımə rujədə, Tırkiyə prezdent, Rəcəb Təyyeb Ərdoğan votışe: oşkoe ki de hırdən, jenon iyən ğeyri hərbion kıştey və de Ğəzzə noxəşxonəon, məktəbxonəon, məçiton və kilsəon bombardımon kardey, əmniyyət icod nibəbe.

Ərdoğan ijən əlovəş kardə: əvəz ım ki israil ıştə səhvə koku obəqardo, bənə qıləy təşkilot de məntəğə xarıc bıə rol ifo kardə kəson təhrikon vositə əməl kardedə.

Ərdoğan Ğəzzədə otəşbasti təşəbbusonku vey rə himoyə kardeyro, beynəlxalğə təşkilaton və kişvəronku dəvətış kardə iyən votışe: israil bəpe təcili etosniye bə oxo bırosno.