Vəomə 6 manqi mıddətədə İron, Rusiyə və Azərbaycan R. miyono ruşnə mıbodiləon

İroni enerji vəzir vəoməy 6 manqi mıddətədə, və mıştərəkə surət İron, Rusiyə və Azərbaycan R. ruşnə mıbodiləon bino beyku xəbəş do.

Bə Tele-Rədio aqentiyəti raporti əsos, jurnaliston cəmədə İroni sənaye beynəlxalğə 23 minnə nımoyişqo oj bemoni kənoədə, İroni enerji vəzir Əli Əkbər Mehrabiyan İron və Rusiyə ruşnə şəbəkə icod kardey barədə votışe: Tırkəməniston, Azərbaycan R. və Qurcıstoni royku, bə Rusiyə  kişvər İroni ruşnə şəbəkə dəçokney mıtoliəon hərəkəton əncom bıə.

Mehrabiyan ijən əlovəş kardə: həmonə roy ki icroi cəhəto hoston bə nəzə rəsə, və bə şəbəkə inkişofi ehtiyocış ni, Azərbaycan R. roy be və ım baxşədə de ım kişvər və Rusiyə kişvər vey çokə sazışon əncom bıə.

İroni enerji vəzir ijən ıştə umu nışoş do ki vəoməy 6 manqi mıddətədə və və mıştərəkə surət İron, Rusiyə və Azərbaycan R. ruşnə mıbodiləon bino bəbe, ım plan vey iğtisodi be boçi ki İron və Rusiyə məsrəfi pik de yande farğ kardedə, yəni həmonə zəmon ki Rusiyə veyə məsrəfış heste İron vey kamə məsrəfi zəmonədəy.

Mehrabiyan ijən de işorə bə de hamsuyə kişvəron enerji mıbodiləon votışe: bə mıştərəkə planon bə nav şey xoto, de Ğətəri kişvər mıtoliə mərhələon əncom bey holədəy və umu heste ki nezə vəoməyədə ım planon bə icro bırəsi.