Az.R budcə defisiti çe arə barde mumkun bedəni
Az.R 2017-minə sori Devlətə budcə nəzərədə qətəşe ki, yanvar və fevralə manqədə Verqi Vəzarəti tərəfo 416 milyon mənot verqi bə budcə daxil bənine. Əmo vəzarəti həmonə məbləği cəmi 49%, yəni 205 milyon qırdə karde zınəşe. İm bə ponə sori nisbətədə 47% kame. Devlətə Kemruqə Komitən ım sori aprelə manqədə 187 milyon mənot kemruqə rusum və verqi bə budcə daxil kardəşe ki, ımən bə ponə sori nisbətədə 17,7% sarue.
Jıqo statistik rəğəmon respublikadə maliyyə behrani çanədə qıvonin bıe nişon dodə. İğtisadşunason çimi səbəbi ğeyrəz iğtisadi tənəzzuli, həmən monopoliston ıştə mənfəəton çe verqiku niyo kardedədə, və verqiə pulon mufəttişon tərəfo dızdieədə vindedən. "Azxəbər.com" 7 nəfər roy polisi, cərimə pulon bə budcə onıvoştone barədə nıvıştışe. Çəvon cinayətə əməli nəticə ım bıe ki, əvonşon çe koyku tojnie, əmo bə çəvon rəisi - podpolkovnik Firdovsi Yusifovi xoto nıqınin. İm polisonən votedən ki, əvon ıştə ım rəisi dəstur icra kardəşone.
"Azadlıq.info" saytən 30 qılə dıjdə şirkətə qrupon nomon dərc kardəşbe ki, əvon təmamən çe Verqion Vəzarəti siyahədə nin. Yəni ım muəssison bə devləti budcə verqi dodənin. Sayti muxbir ehtimal kardedə ki, i qılə de Prezidenti ailə əlağədar bıə şirkəton jıqo curətədə be bəzınen.
Hokuməti maliyyə nırəsey pur karde ijən bə xalqi qiy noəşe. Məsələn, Sumğait şəhəri mərizxonon 50 həzo mənot, poliklinikon 15 həzo, təcili tibbi komək stansiyon 20 həzo mənot pul avjor kardəninin. Sər həkimon - 5 həzo, şebə mudiron - 1 həzo, laboratoriya, rentqen kabineton - 1 həzo, cərrahon -700, sıravi həkimon - 200 mənot, şəfğətə hovon - 100 mənot, sanitaron - 30 mənot pul doəninin. Lankoni məktəbi muəllimonkuən muəyyən məbləğədə pul qırdə karde həxədə xəbəon hestin.
