Ərbəini zəvvaron miğdar har sornəsən vey bıə
Həzrəte İmom Huseyn (ə) və Kərbəlo faciə diqər şəhidon Cilimə mərasim - Ərbəini ruji bə Kərbəlo ziyarət omə zəvvaron miğdar har sornəsən xeyli ziyod bıə - bə 27 milyon rəsə. Im xəbə barədə bə İmom Huseyn (ə) Muğəddsə hərəmi rəsmi sayti istinadən "Maidə.az" sayti nıvıştəşe. Hərəmi rəhbəriyyəti votəşe ki, bə Kərbəlo varid bəkəson hələn dəvom hestışone, bı səbəbən ım hələ yekun rəğəm ni.
Zəvvaron miğdari ziyod bıe əmniyyət ğıvvon miğdariən ziyod karde zərurət bə meydon vardışe, bə qorə çəvon miğdarən bə 50 həzo nəfər rosniə bıe. Əmniyyətə ğıvvon fədakarəti bə xərəbkaron ıştə deşmenə hərəkəton icra karde imkan nıdoşe. Çəvon jıqo qıley yekanə cəhd Vasit əyalətədə bıə ki, əmniyyəti ğıvvə həmkaron çey və seşone.
Nəcəfi-Əşrəf Muğəddəsə Məkanon Təşkilatə Komitə sədr Əlirza Fədakari bə İRNA məlumat doəşe ki, ımsor 80 qılə məmləkəto Ərbəini ziyarətədə iştirak karde ro bə Kərbəlo zəvvaron omən. Ən vey çe İron, İrağ, Az.R, Əfğanıstan, Pakistan, Hindistan, Suriya, Malayziya, İndoneziya, Turkiyə və Livani şəhrıvandon bıən.
Noyabri 9-ədə, Ərbəini ruji Azərbaycani İslamə Partiya Zənənon Şura Boku Beynəlxalğə Mətbuatə Mərkəzədə de "Ərbəin - dıminə Aşura" mevzu qıley konfrans dəvunişe. Şura sədr Nevrəstə xanım İbrahimova votəşe ki, ısət "har vırə - Kərbəlo, har ruj Aşura" şuar bə zulmi əley mubarizə əsasə çumlə peqardə. İslami məmləkətonədə, Suriya, İraq, Fələstin, Yəmənədə zulm və sitəmi mevcud bıə halətədə Kərbəlo məktəbi ibrət həmişə aktual bəbe, Əhli - Beyti tərəfdaron İmam Huseyn (ə) pərçəmi həmişə barz bəqəten.
