Vəkili de dini məhbus Əhsən Nuruzadə vindemon kardəşe

Vəkil Yalçın İmanovi de dini məhbus, Mısılmonon İbemonə Hərəkati uzv Əhsən Nuruzadə zindonədə vindemon kardəşe. Bə Rakrus TV votəşe ki, çe Əhsəni əhvol çoke, mubarizə əzmşən xeyli barze.

Ey İmanoviku xahiş kardəşe ki, çey ım fikron bə ictimaiyyəti bırosno. Bə cəmiyyəti muraciətən votəşe ki, "az hələ azadiədə beədə zınedəbim ki, çəmə imoni roədə bardə mubarizə qıvonin və xətomande. Əqər əmə bə xıdo pənahən bə ro dəqınəmonbu, bı roədə çəmə kəşə har qıley əziyyət və əzob, izzət və şərəfmandə əməle. Çımı mubarizə əzm həniən ziyod bıə. Bəşmə votem pidə ki, mubarizə meydonədə fəaliyyət və təbliğati  həniən ziyod, vəhdəti tikiən zumand karde lozime. Bə xıdo pənah buənən, əv bı roədə bəmə komək bəbe".

Əhsən Nuruzadə dini fəaliyyəti səbəbiku polisi tərəfo 2 kərə dəstqir kardəşonbe ki, ıştə fəaliyyətiku dast bıkəşo. Əmo ey har səfə bə 10 sutkəninə zindonə cəzo məhkum karde əvış çe ıştə əğidəku qordınie nızıne. Oktyabrə manqi 6-ədə "Bandotdel"i polison tərəfo 3-minə kərə dəstqir bıe, bə çey əleyh de narkotik maddə ticarəti ittihami cinayətə ko bino kardışone.

Boku Qonə Cinayəton Məhkəmədə Hacı Zulfiğar Mikayılov və çey tərəfdaron muhakimə orəxnə məhkəmə iclason dəvardedə. Muttəhimon bə məhkəmə ıştə orəxnə sıxanon votedən. Hoyabri 6-minə ruji məhkəmə iclasədə Eldar Bunyadov, Ramil Seyfullayev və Ruzi İsmayılovi orəxnə votemonədə prokurori bə çəvon əleyh bə nav doə ittihamon rədd kardəşone, Ruzi İsmayılovi əlavə votəşe ki, bə xıdo pənah vardedəm, həmən bə hakimi həxi tərəfədə bıe bovə kardedəm ki, çəmə həxədə ədalətinə ğəror bebəkarde.