Az.R-ədə səhiyyə sistemi vəziyyət

Az.R rəsmiyon daima məmləkəti iğtisadi-ictimai jimonədə hiç qıley problemi nıbe iddia kardedən. Səhiyyə sistemiən dınyo standarton səviyyədə bıe votedən. Əmo real vəziyyət hiçən bə hokuməti rəsmiyon kardə tarifi muvafiğ omedəni.

Bı rujonədə AİŞ Devlətə Departamenti bo ıştə bə Az.R səfər karde niyyətədə bıə şəhrvandon qıley xəbərdarnamə tərtib kardəşe. Əyo bə ım şəhrıvandon çəşnavi dodə ki, Az.R-ədə səhiyyə sistem problemin və ğeyri-peşəkar bıe qorə imkani daxilədə çıvrey tibb sistemi xidmətiku istifadə nıkon. Departament məsləhət zınedə ki, Amerikaku omeədə deştə lozim bıə dəvocaton peqəton, çunki ə dəvocaton ki, Azərbaycani aptekonədə həvatedən, çəvon tərkib və doza bə çəvon marka muvafiğ bedəni, yəni soxtə bedə. Bokuədə təçili tibbi koməki səviyyən xeyli sarue, ğeyr-əz pirimitiv tibbi problemon, əv co koməqəti karde holədə bedəni.

AİŞ ım idarə həmən bəştə şəhrıvandon məsləhət zınedə ki, Az.R-ədə silə noxəşi intişar karde səbəbiku bəştə lazımi peyvəndə darzəni bıdon je, və ıştəni sığorta bıkon.

Meydan TV Boku aptekonədə psixotrop pereparaton beicazə və beresept həvate barədə nıvıştəşbe. Boku Şəhər Prokuratura və Sər Polisə İdarə bahəm məlumat pevolo kardəşone ki, şəhəri aptekon muntəzəm monitorinq kardedən, çimi nəticədə "Bizim aptek" nominə muəssisə soyb Tural Abiyev psixotrop həbi ğeyri-ğanuni həvate səbəbiku dəstqir kardəşone.

Əmo Respublika səhiyyə sistemədə nırəsəyon de ımi orəxedəni. Vəkil Aslan İsmayıloviən Respublika Milli Onkoloqiya Mərkəzədə rışvəxorəti və ıştənbəsəti həxədə bə ictimaiyyəti qıley video muraciət vığandəşbe. Respublika səhiyyə sistemi nırəsəyon barədə KİV-ədən çand sorone ki, tənğidi fikron vırə hestışone. Əmo hokumət bımon hiç qıley əncon kəşe zınedəni. Isət vəziyyət bə qıley səviyyə rəsə ki, xarici devləton bəştə şəhrıvandon çəşnavi dodən ki, bə Az.R omeədə ıştə səhhəti hodi bıkon və ehtiyatə tədbiron bıvindon .