Avropa Parlamenti deputaton bə Əliyevi muraciət kardışone

Avropa Parlamenti 44 nəfərədə ibarət i qrup deputati bə Prezident İlham Əliyevi muraciət vığandəşone. Bə Azadi Radio istinadən "Azadlıq.info" xəbə dodə ki, ım muraciətədə əvon Əliyevşon dəvət kardə ki, jurnalist Əfğan Muxtarlı, həmən diqər siyasi məhbuson dərhal və beşərt azad bıko, votəşone ki, ım, Az.R hokuməti de Avropa İttifaği bə həğiğiə həmkarəti və həmtərəfiəti sadiğ bıe numayiş bəkarde.

Çimi bə nav, hələ oktyabri 25-ədən Avropa İttifaği Naziron Kabinet bə ğəror ome ki, bə Boku hokuməti tosə noyabri 29-i mehlət bıdo, əv ya 2014-minə sori Bəşəri Huğuğon dair Avropa Məhkəmə bə İlğar Məmmədovi azad karde dair ğərari icra bıko, yaanki, ey azad nıkarde barədə ıştə nəzəri nıvıştəyə formada bəvon təğdim bıko.

İlham Əliyevən çımon muğabilədə Bokuədə TAP 25-minə  sorqardışi yubileyə mərasimədə votışe ki, "çe Azərbaycani de Avropa İttifaği arədə ısətnə süniə krizisi qıno çey Sər katib Yaqlandikue. Əmə bə çəmə munasibətədə dıdimə və nohəxə siyasəti həmişə adekvat cəvob doəmone. Ehanə ım krizis dəvom bıko, çe ım təşkilati tərkibo beşeən bəznemon". Siyasi təhlilqəron fikir jıqoe ki, qirəm Azərbaycan Aİ tərk bıko, və ya ey çəğono beğandon, ımi bo Azərbayçani şəhrıvandon bədə nəticəş bəbe. İ.Əliyevi hokumət repressiya hərəkəton həniən şiddətin bəkarde.