Hokumət bə mustəğilə vəkilon təzyiği həniən qıvonin kardedə

Milli Məclisi bə "Vəkilon həxədə ğanun"i əvəzon karde nəticədə Vəkilon Kolleqiya uzv nıbə huğuğşunason məhkəmədə bənə vəkili iştirak karde inkan qin kardışone.

Isət hokumət  bə ım Kolleqiya daxil bıə, əmo mustəğil fikrinə vəkilon səpe bə hucum beşə. "Vətən uğrunda" bə "Bastainfo.com" sayti əsasən xəbə dodə ki, Respublika Sər Prokurori muavin Rustəm Usubovi bə Vəkilon Kolleqiya çe - Hemət Kərimli, Əsabəli Mustafayev, Fəxrəddin Mehdiyev və Aqil Lahıcovi barədə təğdimat nıvıştəşe ki, çəvon barədə tədbir bıvindon. Çimi bə navən Ədliyyə Vəzarəti ce vəkil Yalçın İmanovi, Şəki Qonə Cinayəton Məhkəmə hakimi çe vəkil Elcin Sadığovi barədən jıqo təğdimaton nıvıştəşbe. Nafkonə vaxtonədən məhəkmonədə hakimon tərəfo ğanuni darıştə fakton cəmiyyəti nəzərədə faş kardə mustəğilə fikrinə vəkilon- Xalid  Bağırov, Namizəd Səfərov, Əlayif Həsənov, Muzəffər Baxışov, Aslan İsmayılov de jıqo təğdimati çe Vəkilon Kolleqiyaku beğandəşobe. "Azadlıq.info" nıvıştedə ki, tosə ısət bə çand qılə vəkilon səpe ikərədə yıqo veymiğdarinə həmlə bıə nıbe.

Eksperton votedən ki, hokuməti ım hərəkəton məğsəd çe Vəkilon Kolleqiya mustəğil fikirinə uzvon bəştə tabe karde, və ya de Kolleqiyaku beğande roy çe məhkəmə prosesiku bə kəno noeye. Tosə ısət məhkəmə-mudafiə sistemədə mustəğilə vəkilon çe hokuməti nəzarət və təzyiğiku bə kəno bin. İsət Əliyevi hokumət ım imkani çe şəhrıvandon dasto se ro jıqo ğeyri-ğanuniə hərəkət kardedə.