Entexabatə Məcəllədə əvəzon kardeyədə məğsəd çiçe

Milli Məclisi Huğuğ Komitə iclasədə bə Entexabatə Məcəllə əvəzon muzakirə bəkarden. Dekabri 15-də Parlamenti plenar iclasədə bə muzakirə bənon. "Azadlıq.info" bı barədə nıvıştedə ki, bə ım məcəllə 19 qılə maddə əvəz və əlavon nəzərədə qətə bedə.

Əmo ım əvəzon jıqo vey be cəmiyyəti nəzəri çe hokuməti əsasə məğsədiku bə kəno doeye. Siyasi analitikon nəzər jıqoe ki, Prezidenti Adminstrasiya 2018-minə sori prezidentə entexabaton bəştə plani muvafiğ dəvunie pidəşe. Im roədə mumkun maneon çe arə barde, ehtimali rəğibon imkanon çəvon dasto se ro bə Entexabatə Məcəllə ıştə piə əvəzon bəkarde.

Dekabri 5-ədə Prezident İlham Əliyevi Verqi Vəzarəti nazir Fazil Məmmədov çe ım vəzifəku azad kardışe. Bə çey vırə Təhsilə Vəzarəti nazir Mikayıl Cabbarovış təyin karde. F. Məmmədov həmən Velosiped və Dəçıkəy Federasiyon sədr bıe. Im federasiyonədə bə "Sputnik" sayti muxbiri "şımə federasiya sədr ki bəbe" suali cəvob doe zınəşon ni. Votəşone ki, bə jıqo suali cəvob doe çəvon səlahiyyəti çərçivədə ni.

Isət Təhsilə naziri vəzifə muvəğğəti çe Cabbarovi muavin Ceyhun Bayramov icra kardedə. Bayramov de tosə 2013-minə sori mayə manqi 30-y Verqi vəzarətədə ko kardedəbe. Çəyo de Prezident Əliyevi sərəncami Təhsilə nazir M. Cabbarovi muavin təyin kardışone.

Verqion nazir Fazil Məmmədovi çe koyku bekarde səbəbi barədə Az.R rəsmi mass-medion hiç qıley şərh doəşon ni. Prezidenti sərəncomədən çe ım əvəzi səbəb izah bıə ni.