İronədə Ğədrə şəvonku 3-nə fəzilətinə şəvi mənəvi mərasimon bərpo be.

De dindaron və mısılmonon əzəmətinə huzur iyən iştiroki zinə şəv İroni həmməy vıronədə Ğədr fəzilətinə şəvonku 3-nə şəvi mənəviyə mərasimon bərpo be.

İmomət və vilayəti aşığon mubarəkə rujə manqi 23-nə şəvədə ironi məçiton, təkiyəon, huseyniyəon, ımomzodəon və məzhəbiyə vıronədə cəm iyən detosə sıbi bə Kərimə Ğıroni ğəraət karde məşğul bin, Coşəne kəbir dıvoşon hande və İlahi əzəmətinə nomon zomzomə kardeışone tə xıdovənde xalıği rəhmət iyən məğfirət bəvon ğısmət bıbu.

Şiəyon 1-nə İmomi şəhodəti matəmə şəvon xoto həm Əhle Beyte İsmət və Təharət(ə)-i məddahon Molaye Muttəğiyan Həzrəte Əli(ə)-i həxədə nohə iyən mərsiyə handışone.

Rujə manqi 19 minə səhərədə Xəvaric qrupiku İbne Mulcəm Muradi qıləy holədə ki İmom Əli(ə) Kufə məçitədə nımoj vote holədə be dıştə zəhrinə şımşi ə Həzrəti mıborəkə sə anədə de şiddəti zəxmin kardə ki oxoy sə şiəyon i minə İmom 2 ruj bəpeştə yəni rəməzanə manqi 21 kədə şəhid be.

İroni mısılmonə millət məxsusən Məşhədədə bıə İmon Reza(ə) iyən Ğomədə bıə Xanım Məsume(s) pokə hərəmon həmçınin Şirzədə bıə Əhməd İbne Musə Şahe Çırağ(ə) hərəmədə cəm bən və de Kərimə Ğıroni bə sə noe iyən məxsusə dıvon hane ujnən de Xıdovənde xalıği və Əmirəl-Mumınin(ə) əhd bastışone.

Mubarək rujə manqi 19, 21 və 23-nə şəvon həmonə Ğədrə şəvonku iborəte ki mısılmonon de şəvədə oğo mande, Ğıroni bə sə noe, dıvo hande, Coşən Kəbir nomo məxsusə dıvo ğiroət karde deştə Pərvərdıqori bə raz-niyaz iyən mınocat karde məşğul bıdən.

Ğədrə şəv qıləy şəve ki 1 sori mıddətədə bənə çəy fəzilətinə şəv peydo nibəbe, anədə ki ım şəvədə ibodət karde bənə 1000 manqədə bıə ibodət ğeyd bıə və həmonə şəvədə cəmaəti təğdir iyən tale mıəyyən bəbe.

De Əhle Beyte İsmət və Təharət(ə)-i məxsusə inoyəti inçaəllah ki şımə zinə Ğədrə şəvi ibodəton xıdo dərqahədə ğəbul bıbu.