İroni prezident rujə idi bə mısılmonə İronıjon təbrik votışe.

İroni prezident qıləy peyğomi vasitə rujə idi bə İroni həmmə mısılmonon təbrik vote bəpeştə Ğuds beynəl xalğ ruji şemonədə İroni milləti əzəmətinə huzur və iştirokiku ğədrdonəti iyən təsdığ karde: çıme bovə ıme ki Fələstini sərzəmin de Xıdo koməki bə ım sərzəmini soibon obəqarde.

Bə İrna raporti əsos İroni prezident, Həsən Ruhani ıştə ım peyğomədə təkidış kardə: islamiyə iştimaiəti dılədə mıburəkə rujə manq iyən rujə idi bənə de şəytuniyə həvəson mubarizə barde səbarzəti ruje və az bə Xıdo təşəkkur kardəm ki İroni millət hejo ləyoğətış be de həmməy mısılmonon bə ico ım id iyən mənəvi islohot, ibodət və bandəçiyəti bərəkətonku ıstifodə bıkən ijən Xıdo lutf-inoyəti jentonədə bıbun.

Pəyğomi co baxşədə ğeyd bıə: Rujə idi təbrik vote bə peştə Fələstin məzlumə milləti həx-huğuği bəji karde iyən İslomiyə umməti vəhdəti oğəteyro Ğuds beynəl xalğ ruji şemonədə İroni bəsirət xıvand bıə milləti hərorətin və ğəhrəmanə iştirokiku ğədrdonəti kardəm iyən bovəm heste ki Fələstini sərzəmin de Xıdo koməki bə ım sərzəmini soibon obəqarde.

Ruhani əlovəş kardə: sori middətədə de mubarək rujə manqi iştimaiye, əxloği iyən mədəni əsəron hifz karde sayədə bəpe bo İroni İslomiyə nizomi hədəfon əməli beyro çimiku vey cəhd kəmon.

İronədə ımruj cımə Xordad manqi 25 bərobər de İyuni 15 Şəvvalə manqi 1 və rujə id elan be.

Imruj İroni mısılmonə cəmaəton de dınyo mısılmonon bə ico i manq rujə qəte və de xususi ibodəton İlahi bərəkətinə Rəməzanə manqədə mehmon və ğonəğ bey bəpeştə de Fet ya həmonə Rujə idi dəme dıl və coniku nopokion pok kardən və ijən bəştə zot-fitrət oqadışone.