Ruhani:nati həvateku ironi məhrum karde əməli ni.

İron İslam Respublika prezdent nati həvateyu ironi məhrum kardeyu bə Amerkə fəaliyət işarəş karde və votışe:ə hədəf ki amerkəvıjon nati həvateyu ironi məhrum kardeyu nəzədə qətəşone ne ım ki əməli nibəbe bəlkə ve xətoə koy.

Həsən Ruhani 2 şanbə ruji niyuyurkədə Amerkə mediyaon yolə midiron qıləy cəmi vindımonədə işarəş karde ki Amerkə prezdent Donald Tramp bəpe bə ironi milləti zid ıştə ve səhvə hərəkəton əvəz bıkə və votışe: Tramp har qılə dəliliku bə kəno atom təvafuğiku xaric bə və ironi milləti har qılə dəliliku kəno de sanqsiyaon və təhdid dim bə dim kardə və ironi daxili koonədə həm dəxalət kardə,boçimixoto bəpe har qılə bəhsiku bə nav ım səhvə hərəkəton cobran bıkə.

Ruhani əlavəş karde Amerkə tərəfo ironi milləti de sanqsiyaon dim bə dim karde ğeyre ğanoni və zılminə hərəkəte və ım sanqsiyaon,Amerkə devləti həxədə ironi milləti nəzədə təsirış heste və be illət ni ki  milyoniyə aksiyaonədə ironi milləti şoaron bə Amerkə devləti zid ha zəmanisə ve tınd bə.

əv bə Amerkə məsləhət de İron muzakirə kardeyu işarəş karde və votışe: əqər ruji Amerkə de sədağət ıştə xətoə rəftoron cubran və şərayeti çok karde domoədə bıbo bə zəman İron muzakirə barədə bə ğərol bome.

İron İslam Respublika prezdent ironi cənub ğərb Əhvaz şəhri terroristiyə hucumədə bəzi məmləkəton roli barədə həm votışe: Amerkəvıjon islami inğilabi əvvəliku desbə ısət həmmişə bə ironi zid terroristiyə qruponku himoyəşon kardə.

Prezdent Ruhani eyne holədə suriyədə de terarizm mubarizə barde həxədə işarəş karde və votışe:suriyədə məsləhət doeyu ironi huzur ğanoniy və de terarizm mubarizə bardeyu bə ım məmləkəti devləti tələbi əsose və çəy vədə suriyədə sionist rejimi hərəkəton məntəğə şərayetış bevəc kardə.

İron İslam Respublika prezdent bə yəmənı bıhron işarəş karde və ıştə sıxanon dəvomədə əlavəş karde yəmənı bıhron bə be mudafiyə milləti zid hucumon və ğətleamon oxo doeyu və yəmənıjə qrupon miyonədə votımon təşkil karde coqlə roş zınə.