Imruj:İslamiyə İronədə bəsicı təşkil be sorəqardışe.

Nov 26, 2019 06:21 Asia/Tehran

Imruj 3 şanbə miladi 2019 minnə sori noyabri 26 de İroni islamiyə Respublika təsisə əkə mərhum İmom Xomeyni əmri əsosi bəsice mustəzəfanı təşkil be sorəqardışe.

İslami inğilabi səbarz be bəpeştə və beynəlxalğə istikbariyə daston ironi faydonku ğət be bəpeştə ,bə İroni zid deşmenon fitnəqərə hərəkəton rujm bə ruj ve bı.

Jıqo qıləy şərayetədə mərhum İmom Xomeyni miladi 1979 nə sori noyabri 26 yəni hicri şəmsi 1358 nə sori azər manqi 5 nə ruji bəsic mustəzəfan təşkilati təsis be əmrış do.

İroni cıvonon dərhal mərhum İmom Xomeyni əmri bəpeştə bə İroni zid İraği təşkil doə canqi cəhbəon şin və 8 sor mığəddəsə mudafiyə devranədə ıştə coni təğdim kardeədə ıştə tojə islamiyə inğılabışon bəji oqəte.

İslami inğilabi yolə rəhbəri Həzrət Ayətullah Xamenei bəsicış İroni milləti əzəməti simvol və məmləkəti daxilədə bə kar omə ğıvvəş zınə və votışe: bəsic inğilab və İslamiyə Respublika nizomi dustonru bə ommid və etımod və islamiyə nizomi deşmenonru bə tars və dəhşət bois bedə.

Bəsicion dəvardə 40 sorədə ne fəğət mudafiyə və hərbi mıxtəlif baxşonədə İron İslam Respublika nizomiku mudafiəş kardə bəlkə elm və texnoloqiyaədə həm həmmişə bə yolə inkişaf bois bə.

İronədə bəsiciyə təfəkkuri muvəfəğiyyət bənə inğilab və islamiyə respublika nizomi hərəkəton mərkəz məntəğə coqlə millətonru qıləy olqo bə.

Suriyə və İrağədə milləti tərəfo təşkil bə ğıvvə və de terarizm mubarizə bardeədə ım 2 qılə məmləkəti silahinə ğıvvon kənoədə yolə muvəfəğiyyəton kəsb kardeədə rolışon ifa kardə ki bəsiciyə təfəkkuriku olqo qəteədə əncom bə.

Imruj islamiyə İroni sərasərədə bəsicı mıxtəlif dastəon milləti mıxtəlif qruponku mərasimon bərpokardeədə ijən həmmə cəhətdə islamiyə ironiku mudafiyə karde və islamiyə Respublika inkişaf doe ro dəvom doeyu ıştə hozzı mande elan kardən və tojədən de islamiyə inğilabi hədəfon əhd-peymon bastən.