Cihodi meydon bəpe Fələstini həmmə sərzəminədə hevuj bıbu.

İroni Yolə Rəhbər votışe: hukmən sionist rejimi virus məhv bənine və de cıvonon imon, izzət və cəhdi ım rejimi rişə məntəğəku məhv bəbe.

İroni Yolə Rəhbər zinə Ğuds beynəl xalğə ruji mınosibət bə İroni islamiyə inğilobi bəpeştə bo Fələstin milləti mubarizəonro qıləy tojə fəsli oj bey işorə və təkidış karde ki de həminə inğilobi bərekət ğudrət balans bə mubarizəkan tərəf əvəz be.

Həzrəte Ayətullah Xamenei isətnə muğğəddəs mubarizə və yolə cəhodi dəvomi barədə bə 7 qılə nuktə işorəş karde: Fələstin məsələ qıləy Fələstini ya xot ərəbi məsələ çərçivədə məhdudon karde, bəhr ta nəhriku həmmə Fələstin sərzəmini ozodəti iyən həmmə Fələstinıjon bəştə sərzəmin oqarde, bə ğərbi zalimə hukuməton iyən vabəstə beynəl xalğ təşkilaton ya xot məntəğə vabəstə be abro dıvləton xatircəm mande, islam dınyoədə məsələ həxi barədə ğeyrət sohibə cıvonon ciddi tələb, həlokəkə həğiğəton vədə mubarizə, Fələstini həmmə sərzəminədə mubarizə cəhod meydoni hevujəti zərruriyat və de Fələstini həmmə ğom-dinon iştiroki refrandomi dəvoniye.

İroni Yolə Rəhbər, İmomXomeyni(r) tərəfo Ğuds ruji təyin karde qıləy ağılmand və hoşinə tədbir Ğudsi barədə çı mısılmonon miyono vəhdət və həmdıləti icod karde xoto bə hisobış varde və bə ım ruji və beşte barədə hamiyəşe: sionist və istikbori cəhbə siyasət ımruji zəif karde iyən mısılmonon tərəfo Ğuds beynəl xalğə ruji çı yod və bekardiye ki bəpe dəy muğabilə kəmon boçi ki hukmən mısılmonon ğeyrət və bə nəfsi etemod karde sayədə ım yolə ruji məhv karde əbe ni.

İroni Yolə Rəhbər Ğuds şəhidon əcumlə Şeyx Əhməd Yasin, Fəthi Şəğaği, Seyed Əbbas Musəvi, Şəhid Ğasım Suleymani və Şəhid Əbo Məhdi Əlmohəndes yodi əziz qəte bəpeştə təkidış karde: Fələstin kişvəri işğal və sionist rejimi xərçənq vəji binorə amil ğərbi dıvləton iyən çəvon şeytoni siyasətonin; sionist sistem və sioniston bəpe məhv bıbun.