İroni milləti muğavimət dışmenon məğlubiyəti bois be.
İroni prezideni zinə Nəvuzə İdi məxsus nıtğədə İroni milləti muğaviməti çı dışmenon məğlubiyəti bois bə hisobış varde.
Həsən Ruhani bə anti İron icbor bıə iğtisodi be rəhmə zalimanə canqi işarəş karde və votışe: İroni millət qıle holədə bə de Koronavirusi mubarizə barde meydonədə varid bin ki beynəlxalğ adi koməkonku məhrum bey kənoədə hətto bə xarıci bankonədə bıə ıştə puliku istifodə karde həxış nıbe.
Əv təkidıç karde ki ım saxtə sardinə fəsl və ım yolə noxəşəti həmçenin həmzəman co meydononədə canq çı İroni milləti səbr, tədbir iyən muğaviməti sayədə bə qıləy fəxrinə fəsli əvəz be.
Ruhani əlovəş karde: ımruj dışmon ıştən eterof kardedə ki de zu, təhrim və təhdid zıvoni de İroni milləti sıxan vote ımkanış ni liza 3 sor məğlubiyəti bəpeşt həni çorəşon ni ki bə de İroni milləti muzakirə və votımon karde roy iyən şivə oqardon.
İroni prezident votışe: beynəlxalğ siyasət meydonədə vey siyasi erjinə sərmoyə bə dast vardəmone ki çəy nəticə beynəl xalğ təşkilaton və məhkəməonədə bə dast omə huğuği səbarzətionin, ımruj əmə de dınyo vey hevuj iyən nığıl iyən steratejik əloğəon icod kardəmone ki əmələn dışmoni anti İron siyasəton bə izolasiya barde bois bıə.
Ruhani ijən bə İroni omə prezident səçınədə milləti hərorətinə ışteraki işarəş karde və votışe: de veyə işteroki qıləy səçıni dəvoniye tojə ğərni dəme astanədə çı İron milləti orzoon əməli karde ğəti şərte.
