İronədə bıə Koranavirusiku oxonə xəbon.

İroni səhiyyə vəzarətxonə muavin votışe: dəvardə 24 saəti mıddətədə de təəsufi 151 nəfər Koronavirusi mıbtəlo bıə noxəşon İronədə ıştə coni dastiku doəşone.

Bə İrib raporti əsos Simasadat Lari votışe: ısət ım pandemiya nəticədə İronədə mardə kəson miğdor bə 85694 nəfər rəsə.

Xanım Lari həmçenin elanış karde ki tojədən 16664 nəfər bə Koronavirusi mıbtəlo bıə kəs İronədə peydo bin ki çəvonku çand nəfər noxəşxonəonədən.

İronədə tosə bə ısət 3355786 nəfər Koronavirusi qətəşone ki de xoşbəxtiyəti noxəşon miqdoriku 3010090 nəfəri hal-əhvol çok be və əvon noxəşxonəonku mırəxəs və ozod bıən.

Ğeyd kardənine ki tosə bə ısət təğribən bə 25 milyon nəfər nezi İronədə Korona testi əncom doəşone.

Bə oxonə statestikaon əsos, tosə bə ısət 4592139 nəfər İronədə Koronapeyvəndi iminnə doza jəşone iyən 2134622 nəfər həm de 2 minnə doza jəe vaksinə bıən, ım yəni 6726801 nəfər tosə bə ısət İronədə Korna peyvəndi jəşone.