Ayətullah Xatəmi: İron Respublika çı məntəğə kişvəron vey zumandə bıvə kişvəre.

Tehroni cumə nımuji xətib təkidış kardə ki, İron çı məntəğə kişvəron vey zumandə bıvə kişvəre və votışe: İroni islamiyə nizomi iğtidar və ğudrət çın kişvəron stabiləti roədə heste.

Ayətullah Seyd Əhməd Xatəmi bə məntəğədə İrono fobiya siyasəton ziyod bey məxsusən Amerkə prezident Donald Trampi vıjniye bəpeştə işorəş kardə və votışe: məntəğə kişvəron hakimon bəpə oğo bıbun ki Amerkə fəğət çəvonku bənə əbzar istifodə karde fikədəy və bənə Səddam həlok bıə diktaturi i ruj əvoni həm məhv bəkay.

Tehroni zinə ruji cumə xətib həmçınin bə Amerkə siyasəton, məntəğə kişvəron təcziyə və çand poə karde işorəş kardə ijən təkidış kardə: məntəğə kişvəron bəpe çı Amerkə həminə fitnəkorə siyasəton barədə ıştə çəşi oj bıkən.

Seyd Əhməd Xatəmi əlovəş kardə: əqə bıə ne be İron, ısət İşid terroristiyə qrup İrağ, Suriyə və Livanədə ıştə hukuməti binoş kardə bıə.

Tehroni cumə nımuji xətib həmçınin Suriyədə çı Amerkə və bəzi kişvəron əsliyə hədəfi Suriyədə pəre ğədəğən bıə məntəğə icud kardeku avarəon məskun karde zınəş nebe ijən təsdiğış karde: ğərb pidəşe ım məntəğədə və Suriyə təcziyə karde hədəfi sayədə terroriston məskun bıkə.