Kermani terroristiyə cinoyəti barədə 32 nəfər dastqir bıən

İroni cənub, Kerman ostani səprokuror Kerman şəhri terroristiyə cinoyəti barədə 32 nəfəri dastqir beyku xəbəş do.

Dəvardə Çoşambə(Yanvar 3) Sepah təşkiloti “Ğuds” ğıvvon sabiğ komandan, şəhid general Ğasım Suleymani çominə sorəqardışi mərosimi zəmonədə və çe İroni cənub, Kermanədə bə Qolzare Şuhadə tərəf şıə roysə dıqlə intihorçiyə terroristi ki, DAİŞ terroristi qrupi çəy məsuliyyətış bəştə ehdəş peqətə intihori əməliyyotışon əncom do.

Çın teroristə əməliyyoti nəticədə mərosimi zəvvoron miyono 91 nəfər şəhid bıə və 284 nəfər həm zəxmin bıən ki şəhidonku 22 nəfər tələbə bin.

Kerman ostani sərprokuror Məhdi Bəxşi televeziya votımonədə votışe: bə Kermani terroristiyə cinoyəti əloğədor iyən vabəstə 32 nəfər dastqir bıən ki təhğiğon mərhələdə koon dəvom kardə.

Bəxşi de işorə bə həmonə fəaliyəton ki qeneral Şəhid Suleymani 4 minnə sorəqardışi mərosimi bənav əncom bıə, əlovəş kardə: ın əyyomədə Kerman ostanədə 16 qılə bomba kəşf bıə ki ım bombaon ğudrət tıpə intihori jiletonku ve be, ki de əmniyyəti ğıvvon cəhdon kəşf bin.

Bəxşi ijən bəyonış kardə Kermani terroristiyə hodisə muxtəlif cəhətonku təğib bey holədəy, əv  əlovəş kardə: Kermani cinoyətədə intihar kardə amilonku qıləyni Tacikistoni milliyətış be və co qılə şəxsi zıne dəvom kardə.

Bə Bəxşi votəyon əsos, ın hodisəku bəkəno, co 2 qılə intihari amil ki Kermani terroristiyə hodisə şəhidon təşyi mərosimədə əmliyot əncom doey ğəsdışon be, mərosimi bənav zıney iyən dastqir bıən.

Dınyo veyə ali rəsmi şəxson və yolon cobəco mesajon ğolibədə İroni kali şahrvandon şəhodəti təsliyət votey kənoədə, ım terroristiyə hərəkəti məhkumışon kardə.

İ Bıə Milləton Təşkilati sərkatib, Avropa ittifoğ, beynəlxalğə təşkilaton, siyodi icloson, siyosi və məzhəbi rəhbəron iyən rəsmi şəxson, koşınason və təhliləkəyon, ğərbi, ərəbi və islami devləton,  Afrika və Asiya kişvəron həm rəsmi surəti, və de bəyoniyəon muntəşir kardey vositə, ım terroristiyə hodisə ki molki şəxson və beqınohə insonon kıştey bois bıə məhkumışon kardə və de İroni milləti ıştə hamdardi elonışon kardə.