Real iyən virtual aləm

Real iyən virtual aləm

Veb ya www interneti icod bıey bədiqə bə vucud ome,həyğətədə internet qıləy ğab iyən zərf və veb həm çəy dılədə bıə ove.vebi daston çe dijitali məlumoton ideyaku bino be,əmmo hənuz tosə vebi ziyodə roy navədə heste.veb ingilisi zıvonədə bə korətəni tori votedən.bə nəzə rəseydə ın məno ki, əmə əy bənə vebi unvoni zıneydəmon,de hiç qıləy rabitəş ni.əmmo əcələ məkən çın ismi deəy nəhoyətən qıləy rabitəş heste.bo vebi təsəvvıriro bəpe çandə ğədəm deştə zehni hərəkətkəmon.

Iminə qəmədə iqlə sodə korətəni tori təsəvvırkənən.ısət bəvədə giriftor bıə həşəroton əvəzi ıştəni təsəvvırkənən ki,dijitali məlumoton ehtivo kardedə.peşonə qəm ıme ki,ım tor çe zəmini kurə mığdorədə dıjd fərzkəmon.çın təsəvvıri məhsul həmonə seqlə məşhurə hərfe ki,ibtido seqlə kəlmən:World  dınyo mənoədə,Wide yəni hevujəti mənoədə və Web ki,həmonə tori mənoədəy.çımon həmməku hosil bıə çi umumən bımi hevujə dınyo tori nomi noey bəbe.

Vebi seqlə Tafutinə nəslış heste.iminə vebi nəslədə çe mehtəvo iyən məzmuni istehsol de səyfəon soyb ya soybon təvəssuti  bə əməl omeydə və muxotəbon və istifodəəkəyon fəğət məlumoton ğəbul kardey zıneydən.bın nəslədə vebiku çe muxotəb iyən mehtəvo və məzmuni istehsoləkə miyono qıləy dıtərəfinə həmrayəti və rabitə mevcud ni.

Dıminə nəslədə muxotəb ıştən ıştə mehtəvo iyən məzmuni istehsol kardey bəzıne.iyo fəğət məlumot dı tərəfinə şikilədə bə əməl omeydəni,bəlkəm çe fərdon miyono qıləy dıtərəfinə rabitə bə formə dəşeydə.sosyal şəbəkəon ki,ımruj hevujə səviyyədə bə vucud omən,çe vebi dıminə nəsliku bıə nımunəonin.