Pezeşkiyan:Məydoni səbarzəti diplomatiyədə təsbit bıkəmon

İroni prezdenti votəşe:Rasiyonal,məntıği iyən bə milli mənafey əsos bıə barzəti,çe İroni Silohinə Ğıvvon ğələbə təkmiləkə,diplomatiyə ərsədəy.

Bə Pars-Tudey doə məlumoti əsos,İroni İslomi Respublikə prezdenti de İroni İslomi Respublikə İntizomi Ğıvvon(Polis) Sərkomandan iyən idastə Polisi Komandanon bıə didoədə,oxonə canqi cərəyonədə çın ğıvvon bəşəv-bəruj kardə sadığonə səyon iyən mıcohidətonku ğədrdonəti kardə holədə izhorış kardə: Polis Ğıvvon de qırd məhdudiyyəton iyən kamə imkonaton bə ico,çe İroni daxili əmniyyəti təmini məydonədə qıləy zumand iyən fədokoronə iştirokışon bıə.Pezeşkiyan de bə İroni Millət iyən Silohinə Ğıvvon dışmeni nokom haşteyədə bıə roli işorə kardə holədə,bəyodış dənoə:Millət iyən Silohinə Ğıvvon de tovinəti iyən zumandəti dışmeni bəştə hədəfon rəsey koyədə nokom haşteyışon zıne iyən əvışon vodor karde ta otəşvəsi ğəbul bıko iyən canqi oqəto.Pezeşkiyani ıştə sıxanon dəvomədə votəşe:Isət çəmə vədə mıxtəlifə varyanton mevcude.ya de izzəti, zumandəti iyən milli mənafeyon xandi kardə holədə bə mızokirə daxil bıbəmon və çe İroni milləti həxon realkəmon ya həmonə nə canq və nə sulhi vəzyətədə bımandəmon və ya bə canq iyən mıborizə roy dəvom bıdəmon.Əy təkidış kardə:Rasiyonal,məntıği iyən bə milli mənafey əsos bıə barzəti ıme ki,canqi məydonədə de İroni Silohinə Ğıvvon təvəssıti bə dast omə ğələbə diplomatiyə ərsədə həm təkmilkəmon iyən çe İroni milləti həxon de izzət iyən zumandəti təsbit kardey bıbu.