Ətomiyə təvafuği barədə Amerkə stratejikə xətoon kardedə.

İroni ətom enerji təşkilati sədr votışe: strateqiya cəhətiku ətomiyə təvafuğ Amerkəş qic kardə.

Əli Əkbər Salehi Məşhəddə qıləy iclosdə əlovəş kardə: əqə ətom enerji barədə təvafuğ çı İroni ətomiyə sanaye və ğudrəti vədə mane bıə boçi Amerkə və siyonist rejim anədə çəy barədə niqəronin?

Salehi təsdiğış kardə: ısət İroni dastədə çandə emtiyazon hestin və İron karde bəzne ıştə ətomiyə mərkəzonədə santifoqonku ijən de tojə texnoloqiyaon istifodə bıkə.

İroni ətomiyə təşkilat və mərkəzi sədr təsdiğış kardə: təhğiğ karde, inkişof və elmi texnoloqiyaonku istifodə karde həxon de ətomiyə təvafuği bərobər təsdiğ bıə ijən 2 qılə ətomiyə stansiya ğərordadon həm imzo bıə.

Salehi bə ətom enerji sahədə təvafuği bəpeştə çandə bə İroni nati həvatey xoto faydon və moyəon aid bey işorəş kardə və bə 2 milyon bareliku vey nati dınyo sadir karde bənə çın təvafuği bəzi xəyron ğeyd kardışe.

Tojədən çı İron və 5+1 nomo bıə qrupi miyono ətomiyə təvafuği imzo karde 2 minə sorqardış be.

Dəvardə 2 sori mıddətədə Amerkə anədə bə ım təvafuği əleyh hərəkəton və siyasəton əncom doə.