Çavoş Oğlo Yəməni barədə məntəğə ərəb kişvəron siyasəti tənğidış ka.
Tırkiyə xarıci vəzir bə Yəməni zidd Fars Dıyo kali ərəbə kişvəron canqtələbə siyasəton tənğidış karde.
Bə Təsnim aqentiyəti raporti əsos, Mıvlod Çavoş Oğlo zinə elanış kardə, həmonə siyosət ki kali Farsi Dıyo ərəbə kişvəron Yəməni barədə dəvardə 5 sori mıddətədə dəvom dodən çı binovrəku nadırıst iyən səhv be.
Tırkiyə xarıci vəzir əlovəş do, Yəmənədə bənə Ərəbiston və İ Bıə Ərəb Əmirəti kişvəron tərəfo bino bıə canq vey dəhəştin iyən dardinə nəticəon bois bıə ki bombərdımononədə həzo həzo Yəmənıjə hırdənon iyən jenon ğətliam, vəşyəni və noxəşi çand qılə çəvonku hisob bıdə.
Çavoş Oğlo ijən İslamiyə Həmkari təşkilatiku Yəməni bıhroni barədə təhğiğ karde ım kişvərədə canq iyən xuni rukarde bə oxo rosniye cəhətədə omə sori Yanvari 10ədə iclos bərpo karde tələbış karde.
Ərəbiston de İ Bıə Ərəbon Əmirəti, Amerkə və sionist rejim iyən bəzi co mıttəhıdon 2015-nə sori Martiku bə Yəmən hərbi təcovuzi bino ijən ım kişvəri çı zəmin, osmon və dınyoku mıhosirə kardəşone.
Im canq detosə bə ısət 14 həzo nəfər Yəmənıjon kışte, çand 10 həzo nəfəri zəxmin bey iyən çand milyon nəfəri avarəti bois bıə.
