Netanyahu məsxərə nəmayeşi hədəf umum fikon bə dast dənoeye.
İroni xarıci vəzarətxonə sıxanəvot votışe: sionist rejimi iminə vəzir de beynəlxalğ təşkilatonədə məsxərə nəmayeşon pidəşe umum fikon bə dast dəno ta ım rejimi cinoyətkorə rəsmi şəxson beynəlxalğ məhkəməonədə cəzo doə nıbon.
Səid Xətibzodə İ bıə milləton təşkilati umumiyə iclosədə bıə Benyamin Netanyahu tojə məsxərə nəmayeşi çı sionist rejimi iminə vəziri xəbisə niyyəton və Musad cəsosə təşkilati tojə pesoxtə bıə senari bə hisobış varde və təkidış karde: sionist ğeyri ğanuni işğalçi iyən hırdən əkıştə rejimi iminə vəzir de i bıə milləton təşkilati teribuniku suei istifodə karde vositə bə duəvujəti dəvom doydə.
İroni xarıci vəzarətxonə sıxanəvot bə ım rejimi işğalçi iyən irğçiyə mahiyyəti işarə və əlovəş karde: de diğğət bə ım rejimi ixtiyorədə bıə anədə ətom bombaon bəpe jiğo bıvotəmon ki isaril çı dınyo sul və əmniyəti yolə təhdide.
sionist rejimi iminə vəzir Benyamin Netanyahu pəynə i bıə milləton təşkilati iclosədə ətomiyə sazışiku Amerkə xaric bey xoto Donald Trampiku ğədrdonətiş karde votışe: İron ijən ətomiyə silahon soxte fikədəy.
