AİP sədri əvəz Hacı İlham Əiyev de kom ğıvvəon sifarişi dəstqir kardəşone.
Orəxnə vaxtonədə AİP sədri əvəz Haci İlham Əliyev və Mısılmonon İbemonə Hərəkati 5 nəfər fəali Boku hokuməti tərəfo bə zindon dəğande bənə Az.R qıley şiə məmləkəti mısılmonon, həmən İslami ummət xeyli norohət kardəşe.
“Nur-az.com” sayt bə Ğəfğazi problemon dair ekspert çe Həsən Səmədzadə Əliyev hokuməti ım hərəkəti əsl səbəbi həxədə fikron bə əhandon edaştəşe. Ey votəşe ki, Boku hokumət həmişə bə dini cameə alim və navğədəmon munasibətədə repressiyon bardəşe. Əmo orəxnə soronədə əv de ım ğism şəhrıvandon nisbətən amoxt rəftor kardedəbe. Bəs iğtidari ım orəxnə beysurə hərəkəti səbəb çiçe? Məlume ki, Hacı İlhami bə Trampi “əsri savdıqarəti” plani ğəti etiraz votəşbe, fələstinıjə mısılmonon həxon mudafiə kardedəbe. Qeneral Ğasem Soleymani Amerika tərəfo kardə terrori nəticədə bə şəhadət rosnie əməliən Az.R mısılmonon arədə çanədə bə etirazi səbəb bıe. Çəvon ıştə məhəbbət bə islami umməti ım sandinə ğəhrəmani de şevği izhar karde Boku hokuməti idarə kardə sionistə ğıvvonən bərk bə təşviş dəğandışe. Səmədzadə ğeyd kardedə ki, ım əlaməton tam imkan dodə, bıvotəmon: Hacı İlhami de qonə ittihami bə zindon dəğande və bə diqər diniə fəalon əleyh tojə təhdidə kompaniyaon hokuməti məhz de ıştə sionistə duston və cinayətkarə Amerika rejimi sifarişi icra kardəşe.
Azərbaycani navğədəmə ruşinəfamono ibarət ce Haci İlhami mudafiə komitə onoe oşko nişon dodə ki, Əliyevi rejimi bə dini fəalon səpe sənibəton repressiv əməlon tətbiğ karde cəmiyyətədə norohəti bə əməl vardəşe. Jıqo norohəti həmən İİR ictimaiyyətədən heste, əvonən bə Əliyevi rejimi ım ğərəzkarə hərəkəti ıştə etirazon bəyon kardəşone. AİP rəhbəriyyəti təmsil kardə bənə Hacı İlham Əliyevi qıley şəxsiyyəti bə zindon dənoe çe Turkiyə, İron, Rusiya, Qurcistoni mass- medionədə vırə qəte ey nişon dodə ki, joqo qıley dini alim , həmən navğədəmi bə repressiya məruz oqəte bo Boku rejimi benəticə əmandıni.
