Ostoroədə çay çınie bino bıə
Keşvərədə çayəvonəti bərpa karde çe Əliyevi hokuməti prioritet vəzifəono qıleye. Bı koədə Prezidenti 3 sor çimi bə nav “2018-2027-minə soronədə Azərbaycanə Respublikadə bə cayəvonəti inkişafi dair Devlətə Proqram” təsdiğ kardəşe. Bı muddətədə çayə plantasion sahə bə 17 həzo hektar rosnie nəzərədə qətə bedə
Isət Respublikadə çay çınie mevsum bino bıə. Çe “Azadi radio” zona muxbir bə Ostoro rayoni çayə hion nəvə, de çayəvonon quzəroni oşno bıə. Çəvon bo muxbiri votə qəponku məlum bıə ki, sahədə çay çıniə fəhləon əsasən çe Kujobə ğəsəbə və Lovayin diy əjionin. Əvon maddi vəziyyəti bevəc bıe səbəbiku ıştə zəminon həvatəşone. Çəvon zəminon ısətnə xıvandi əyo çayə hi eğandəşe. Əvon ısət bo həmonə sohibkari bənə mıjdəvoni ko kardedən. Sohibkar bəvon bo har 1 kilo çayə livə 25 kopik mışdi dodə. Qıley mıjdəvoni votəşe ki, deştə kinə maştə saat 7-ku tosə şanqo saat 8-i 100 kilo çayə livə çınie zınedən. Bımiyo 25 mənot bəvon pul dodən. Imən kame.
Çayə plantasiya xıvandiən qırey kardəşe ki, ğıyməti çayə fabrika muəyyən kardedə. Əyo havzə çayə livə 1 kilo çəvonku bə 1mənot 20 kopik hıridən ki, ımən çe plantasiya xıvandi bə məhsuli perosnie ro məsrəf kardə moyə bəzu kifayət kardedə. Bə səbəbən çe fəhlon zəhmət həxi ziyod karde ro imkan ni. Ey təklif kardəşe ki, qirəm fabriki soyb çayə livə hıriə məzənnə bə 2 mənot ros bıko, bəvədə əvən çe fəhlon zəhmətə puli ziyod karde imkanədə bəbe.
Ostoro rayonədə 3 qılə çayə fabrik heste. Muxbiri çəvon rəhbəriyyətiku bəştə parsi cəvob se zınəşni. Ostoro Di Təsərrufati İdarə rəis Etibar Abbasobi isə izah kardəşe ki, çəvon bə ğıyməti mudaxilə karde səlahiyyətşon ni. Çayə livə fəhlə, sohibkar və fabriki arədə de roziəti onoə məzənnə hıriə bedə. Əvon qıyməti ıştə arədə muəyyən kardedən.
İbrimi Zahirəddin, çe Rusiya Yekaterinburğ, şəhəriku, İİR sədo, tolışi radio.
