Bo ımsornə sori Ərbəin mərosimiro Qiloni zairon səhmiyə elan bıə.
Qiloni Ərbəin ğərorqo bəyonış karde: bo ımsornə sori İmom Huseyn(ə)-i Ərbəin mərosimədə iştirokiro ın ostan 504 qılə səhmiyə qətəşe.
Bə Tolışi Rədio raporti əsos, Qiloni Ərbəin ğərorqo elanış karde: tosə bə ısət 1 həzo nəfəriku vey qılonıj bo Ərbəine Huseyni mərosimədə iştirokiro ıştə nomi ğeyd kardəşone ki çəvonku fəğət 504 nəfər bənə zair bə İrağ kişvəri vığandey şərti xıvandin.
Bə həminə ğərorqoh votəyon əsos, vığandey bə ə kəson şomil bəbe ki rə ıştə nomi ğeyd kon ijən səfəri bənav lozimə şərton əcumlə korona vaksini 2 qılə doza jey və pəreku 72 saət bənav korona testi mənfi bey sənədışon bıbu.
Qiloni Ərbəin ğərorqo bəyoniyə dəvomədə bə xidmət xeyməon yolon vığandey işarə iyən təkid bıə: 220 nəfər çı xidmət xeyməon mudiron Qilon ostaniku ımsor Ərbəine Huseyni mərosiməsə ıştirok kardeyro vığandey bəben ki bə tələbon əsos ın miğdori bə 320 nəfəri rosniye bəznımon.
Qiloniku oxonə ğərolon jığo hikayət kardeydə ki ımsor 16 qılə xidmət xeyməon Qiloniku bə Ərbəine Huseyni mərosimi vığandey bəben ta İrağədə bə zairon xidmət kon.
2 sor çimi bənav və dınyoədə Korono pandemik şəroyeti bino nıbey zəmonədə 3 milyon nəfəriku vey İronıj əcumlə 52 həzo nəfər Qilonıj Kərbəloədə Ərbəine Huseyni mərosimədə iştirok kardeyro bə İrağ səfər kardə bin.
