Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəlağə şərifə kitobi 130-ə hikmətədə de maqi bə yod dənoey təvəssıti,bə insoni rosnyeydə ki,ın dınyo umr kam iyən kutoe.
Əmirəl-Muminin Həzrət İmom Əli(ə) Siffeyni canqiku oqardedəbe.qıləy canq ki,İslomi ləşkəri bə ğətiyə səbarzəti rəseyro kamə ləzon mandəbe,əmmo oxonə ləzonədə de ləşkəri kali fərdon betəğvoninə hərəkəton de məğlubiyyəti dimbədim ome.ə həzrət çe Kufə dərvozə peştono qıləy ğəbıstoni mande və bə həzrəti betəğvoninə ləşkərisə vey bəyji bıə bımyon xitobən hamyeşe:”ya əhləddiyar...ha çe vəhşətnokə kəon,xaliyə sərzəminon iyən toykiyə ğəbon sakinon ha!.ha bə xok iyən tul nıştə kəson ha!ha ğəribon ha! Ha coyli mandə kəson ha! Və ha çe dəhşəti dılədə bıə kəson ha!.
İmom Əli(ə) de qıləy təbiron həmmə insonon dığğəti bə ın həyğəti səmt cəlb kardedə ki,har qıləy inson ki,ımruj ıştə duston iyən əzizon miyono və ıştə dıjd və ğəşənqə və ya hətto ıştə hırd və bənə daxmə bıə kəonədə jimon kardedən,sıxan votedən,sıredən iyən bəştə sərnıvışti dığğət kardedənin ki,maşkinə ruji çəvon vırə toyki iyən vəhşətnokə ğəbıston bəbe.çəvon şoyvonəti iyən xoşə ləzon bə oxo bərəse və çəvon vində ləzzəton obərəxe,duston iyən nezə odəmon cəm çəvon palu volo-volo bəbe iyən dustiyətiyon çe viro bebəşe.
Əmirəl-Muminin Həzrət İmom Əli(ə) de ın sıxanon səy kardedə de ə həzrəti bə ico bıə kəson ki,bə ın səhnə erəxeydəbin və çə həzrəti sıxanon məseydəbin,çəvon dılon bo həxə sıxanon ğəbul kardero hozzı bıko.əve,dəvomədə jıqo hamyedə:”əntum ləna…”əmə və şımə çe qıləy kərvoni fərdonimon.qıləy ğofilə və kərvon ki,bə Xıdo səmt hərəkət kardedə,şımə bın royədə çəməsə bənaviyon və əmə həm şımə dumo bomemon iyən bəşmə anqıl bəqınemon”.
Əmirəl-Muminin Həzrət İmom Əli(ə) ıştə həkimonə sıxanon dəvomədə çe dınyo aləmi xəbəon seqlə cumlədə xulosə kardedə və hamyedə:”əmmo şımə kəon ki,şımə deştə qırd zu əvın ğəşənq iyən ğoymon soxte,şımə maqi bədiqə bə cokəson dasti eqıniye və cokəson əyo sakin bin.şımə jimoni həmroon ijən həm sənibəton vəyəşon karde və boştə coqlə jimoni həmroonışon səçın karde.şımə mol-devlət iyən sərvəton həm bəşmə varison dasti eqıniye.
“Əmmədduur fəğəd sukinət.....ımon xəbəonin ki,çəmə nəzdədəy,çən,şımə boəmə çı xəbəon heste?”.
İmom Əli(ə) i ləzə fikış karde,peşo bəştə ləşkəri dim qətə holədə hamyeşone:”Summəl-təfət ila əshabihi fəğalə:”əma....əmmo,aqah bıbən ehyanə bəvon sıxan votey icozə doey bıbu,bəşmə xəbə bədon ki, həmməysə çokə azuğə və tuşə (bo axırəti səfəro)təğvo iyən pərhizkorətiye”.
Əmirəl-Muminin Həzrət İmom Əli(ə)ın sıxanon çe Bəğərə mıborəkə surə 197-ə şərifə ayəku peqətə bıə ki, jıqo hamyedə:”və təzəvvədu... azuğə və tuşə hozzıkənən iyən həmməysə çokə azuğə və tuşə pərhizkorətiye”.
