Azərboyconi siyosi məhbuson stend Praqa konfransədə
Oktyabrə manqi 13-də Çexiya paytoxt Praqa səhərədə “Forum 2000” konfransi bə istə kooş bino kardə.
3 ruj dəvom bakardə tədbirədə azərboyconovojə siyosi məhbuson band məlumot numoyiş kardə stendon onoə bən.
Stendədə tolışə alim, tədğiğatəvon İqbal Əbilovi, iğtisaddor alim Fazil Qasımovi, “Toplum TV” , “AbzasMedia” koon ro dastqir bəyon iyən əlidəyon barədə məlumaton vırəşon qətə.
Tədbiri iştirakəkəyonədə III Respublika Platforma Onoə Heyəti uzv Elman Fəttahi bəyonış kardə ki, “Forum 2000” konfransi mızakirə obyekt vey hevuje:
“Se ruj dəvom bəkardə tədbirədə de Çexiya devlət sərdori bərobər navkonə siyosi məhbuson, məhşur siyasi xodimon iştirok kardedən. De sulhi, əminəmonəti band məsəlon, Ukrayna canq ən populyar mevzuonədən. Tədbiri oj kardə mərosimədə Venesueladə oxonə prezident səçınon her-hevuj mızakirə kardə bə. Dınyoədə demokratiyə zəif eqıniyi mızakirə predmet bə.Balkan iyən Şərği Avropa keşvəronədə demokratiya vəziyyət, avtoritar rejimon revanşist fikon iyən muxtəlif keşvəronədə siyosi məhbuson hisobi ziyod be ciddi mızakiron səbəb bə”.
Əz cumlə, siyosi məhbus problemi ro de Azərboyconi band siyosi məhbus stend onoə bə və sərqi dəvonə bə.
Elman Fəttahi, nav COP29 bə rəsmi Boku siyosi məhbuson ozod karde band fikon rosniyə be bəyonış kardə.
“Forum 2000” demokratiya, inson huğuğon, vətəndor cəmiyyəti iyən dini tolerantəti məsəlon dair ojə dialoq barde ro beynəlxalq platformey.
1996-mınə sorədə Vatslav Havel, Eli Vizel iyən Yohey Sasakava tərəfo onoə bə ın platforma, qlobal sulh iyən demokratik idorə karde təhdid bə vanqon mıbarizə barde ro dınyo məhşurə odəmon iyən lideron bə ivrə qırd karde dəvom kardə.