Pars Today

Qiloni islami təbliğon həmohənqəkə şura, de qıləy bəyoniyə sadir kardey vositə, Aban manqi 13 minnə rujış beynəlxalğ istikbori cinoyəton bəyon karde iyən çəvon barədə İroni mısılmonə milləti nifrəti nışo doeyro qıləy fırsət elan karde.

Bə Tolışi Rədio raporti əsos, ın bəyoniyədə ğeyd bıə: Aban manqi 13, İroni milləti muğavimət iyən istikbori vədə mandeyku qıləy zumandə nımonəy ki islami ğiyomi i minnə rujiku bəştə lider İmom Xomeyni(r) tabe mandey, iyən de tağut və zalimon vədə mubarizə bardey, həmçenin beynəlxalğ istikbori ziyodtələbion jintonədə bıə məzlumon həxiku mudafiyə kardey vositə dışmenon dasti çı islomi sərzəminiku kırt kardışone.

Qiloni islami təbliğon həmohənqəkə şura təkidış karde ki ımruj qıləy ruje ta şoqirdon iyən tələbəon bə Amerka marde və bə israil marde şuari vanqi bə aləmi quş bırosnon.

Bəyoniyə dəvomədə, bə məntəğə mısılmononro İroni milləti anti istikbor və muğavimət olqo icodəkə ruhiyə işorə bıə ki beynəlxalğ istikbori zəif bey iyən məntəğə kişvəron əcumlə Əfğaniston, İrağ iyən Suriyəku Amerkə hərbiçion de zəliləti xaric bey zəminə icodış kardə, qıləy həğitət ki pesoxtə bıə yolə şəytoni kamilən məhv bey mıjdəvonəti doydə.

Əmo zinə, həmzəman de İroni həmmə vırəon, de istikbor mubarizə bardey milliyə ruji simvolinə zanq, Qiloni məktəbxonəonədə jə bəy.

Imruj həm saaət 10, və de səhiyyəvi protokolon rioyəti, Aban manqi 13 minnə ruji məxsus mərosimon Qilonədə bərpo be.

Imsor həm bə Koronavirusi xoto, de beynəlxalğ istikbori mubarizə bardey milliyə ruji aksiya bərpo nıbe.

Hicri şəmsi 1358 minnə sori Aban manqi 13, və bə İroni daxıli koonədə Amerkə mıdoxiləon iyən xəbisə planon eteroz kardey xoto, İroni tələbə və şoqirdon Tehronədə bıə Amerkə səforətxonə ki bənə cəsusə lonə ko karde holədə be, qətşone.