Bə Ostoro şəhrıstoni Sım di səyohət
Ostoro şəhrestani Sım di rayon mərkəziku 45 kilometr məsafədə çe Tolışə bandon miyonədə, dıyosə 800 metr barzədə ğəror qətəşe
Cəmiyyətış 900 nəfəre. Deştə əsrarənqiz təbiəti, həmən sırədiən, mehriban, xeyirxahə odəmon cəmiyyətədə hurmət ğəzənc kardəşe. Meydan TV sayti muxbir de ım fakti oşno bıe ro bə həmonə di səyahət kardəşe, ıştə təəssurat bə əhandon edaştəşe.
Diy sakinon votəşone ki, Respublikadə mevcud problemon, roon bevəcə vəziyyət, bərği rə-rə ğət bıe, iyən bekorəti çəvon jimoni qıvonin kardə cəhətonin. Qirəm hokumət bə çəvon di omə roy bə səhmon dəğando, bəvədə xeyli turist bə ım səmt cəlb bəbe. Çunki Sımi ətrofi təbiət xoşmənzərənin, həvosatış poke. Diy nezi ovəşulə heste ki, xeyli turiston bəştə cəlb kardedə.
Diy sakin Qulçehrə Məmmədova kə çe diy dəşədəy. Votedə ki, bə di omə mehmonon iminə bey muraciət kardedən, sıftənə parsşonən ım bedə ki, “ de ım maşini bə ovəşulə ros bıe bəznemon, ya ne? Azən bəvon votedəm ki, bə ovəşulə de UAZ-i şe mumkune. Diədə 2 qılə jəqo maşin heste, bəvon muraciət bıkən. Iştə maşini hejo çımı soədə oqəte bəzıneyon”. Qulcehrə həmən votəşe ki, bə mehmonon məsləhət doe bey xoş omedə, bə çəvon parson de həvəsi cəvob dodə. Çoke ki, orəxnə soronədə bə di omə turiston miğdar ve bıə, ımən bə diy əjion maddi quzərani komək kardedə. Kali odəmon ıştə kəy bə kirayə dodən, de ıştə nəğliyyati əvoni bə ovəşulə, bə muğəddəsə ocəğon, bə piron bardedən.
Muxbiri de 2 nəfər divojə zənəni qəp jəşe, məlum bıə ki, əvon bə məktəb nışe səbəbiku azərbaycani zıvoni zınedənin, tolışiədə qəp jedən. Sakinon isə tolışi və azərbaycani zıvonon zınedən.
UAZ maşini soybon turiston şe-omə bə 5 mənot bə ovəşulə bardedən. Tovıstonə vaxtədə əyo bə mehmonon hətto siməvari çayən təklif kardən.
De Respublika co turistə məntəğəon muğayisədə Sımədə xidməti ğıymət xeyli erjone. Kəy 1 sutkə kirayə bə 20-30 mənote. Muxbiri bə ovəşulə şə roysə qıley çayçiku 1 siməvar çayi ğıymət xəbə səşe. Ey votəşe ki, “ovyəni, şımənən çəmə mehmonyon, çanə bədoyon anədən çey ğıyməte. Çəyo məlum bıə ki, 1 siməvar çayi ğıymət bə 5 mənote, hərçənd ki, Samaxi turistə məntəğəonədə jəqo siməvarə çayi bə 25 mənot təklif kardedən.
Diy sakinon xahiş kardəşone ki, hokumət rayon mərkəziku bə di omə roy təmir bıkardo, bəvədə omə turiston miğdarən ziyod bəbe, ımən ətrofədə jimon kardə divojon quzəroni çok bıe komək bəkarde.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
