İron və İraği miyono iğtisadi əloğəon vədə maneon bəpe ləğv bıbun.

İroni prezidenti i minə muavin votışe: İron hejo İraği ərazi təmamiyyət, siyasi stabiləti və inkişofi himoyədor be.

Bə İsna raporti əsos Shağ Cəhanqiri zinə İron və İraği ticari iclosi cərəyonədə votışe: Amerkə anti İron siyasəton vıcudi əmmo 2 qılə kişvəri miyono ticarəti miğdori 12 milyardiku bə 20 milyard dollar rosniyə bidəmone.

Əv 2 qılə kişvəri miyono turizm əloğəon barədə həm təsdiğış karde: har sor 7 milyon nəfəriku vey turizm 2 qılə kişvəri sərhədiku dəvardedən və ısət Ərbəin Huseyni şimon İron və İraği mədəni iyən dini zərfiyəton simvol hisob bıdə.

Cəhanqiri ım iclosi bənav de İraği i minə vəzir Adel Əbdul Məhdi vindemon karde bə İron iyən İraği miyono əloğəon dəvom karde işorəş ka və votışe: 2 qılə kişvər iğtisadi həmkarion vədə bə sanksiyaon məhdudiyət icod karde icozə ni bədan.

Cəhanqiri təkidış karde: banki  həmkarion bəpe vey ciddi bino iyən hevoj bıbu və ım sahədə İron ıştə təcrubəon İraği rəsmi şəxson ixtiyorədə ğəror doe bəznə.

Adel Əbdul Məhdi həm ım vindemonədə təkidış karde ki anti İron hərəkətonədə İrağ iştirokəkə ni.

İraği i minə vəzir ki qıləy 2 rujiyə səfərədə bə İron ome be İron və İraği miyono bə turizm əloğəon təkidış karde.

Zinə ijən İroni ticarət pala ta rəis, İroni kişvər vəziri əmniyyəti muavin iyən İroni iğtisad vəziri de İraği rəsmi şəxson vindemon karde cərəyonədə bə muxtəlifə sahəonədə əloğəon inkişofi təkid bıə.