Bəhreynədə insonə həxon həmçınan ləğv bedə.

Bəşər həxon diyə əkə təşkilat Bəhreynədə Ale Xəlifə rejimi ğeyri insoniyə hərəkəton və Bəhreyni fəalə şəxsiyəton ailəonku intiğom qəte siyasəton dəvom peydo kardeku tənğidış kardə.

Bə Fars aqentiyəti raporti əsos insoniyə həxon diyə əkə təşkilat ıştə bəyaniyədə bə Londonədə bıə fəalə Bəhreynıj Əlseyd Əlvedai ailəon Bəhreynədə dəstqir karde işorəş kardə və elanış kardə: Bəhreyni rəsmion insonə həxon sahədə fəalə şəxson fəaliyəti vəy qəte ijən əvoni təslim karde xoto çəvon ailəon dəstqir kardedən.

İnsonə həxon diyə əkə təşkilat əlovəş kardə: yəğin ım əktivə şəxsiyəti ailəon dəstqir kardeku hədəf çəy və çəy insonə həxə fəaliyətonku intiğom qəte xoto əncom bıdə.

Tojədən çı insonə həxon diyə əkə təşkilati nızə şərğ hissə muavin bo Əlvedai ailəro jıqo əziyyəton icod karde və əvoni dəstqir kardeyo ım fəalə şəxsiyəti vey qəte hisobış kardə və çın rejimi rəsmionku pidəş be ki jıqonə hərəkəton əvəzi kişvərədə anə insonə həxon bevəcə vəziyəti həl bıkən.

Im təşkilat ijən bə Bəhreynədə çand həzo nəfəri dəstqir karde statestikaon işorəş kardə ki çəvon dılədə bə 100 nəfər nızi hırdən həm ğeyd bıə.

Bəhreyni ğiyam Fevrali 14 miladi 2011 soriku bino bıə və çın kişvəri millət bə Ale Xəlifə rejimi etıroz karde cərəyonədə ğanun hukumət, bə demokratiya əsos dıvlət ijən siyasi islahaton pidəşone ta de məzhəbi cəhətiku nohəxə vəziyəti ləğv bey ijən ədaləti bərpo karde kişvərədə inson həxon və ozodəti həm rioyət bıbu.