Tırkiyə və Suriyə rabitəon bəyji kardeyro İroni cəhdon
Zinə Çoşəmbə siyosi məxsusə koonədə İron İslom Respublika xarıci vəziri ali mışovir təkidış kardə: Tırkiyə və Suriyə 2qılə hamsuyə və mısılmonə kişvəron rabitəon bəji kardeyro, İron ıştə həmmə cəhdon əncom bədoy.
Bə İrna raporti əsos, siyosi məxsusə koonədə İron İslom Respublika xarıci vəziri ali mışovir Əli Əsğər Xaci ki deştə ali heyəti bə ico bə Astanə səfərış kardə be, zinə Çoşəmbə, de Tırkiyə xarıci vəziri muavin Yildiz, məntəğə məsələon barədə əcumlə, de sionist rejimi vositə, Ğəzzə məzlumə milləti ğətli-am və Astanə prossesi barədə deyande vindemon və votımonışon kardə.
Im vindemonədə Xaci Ğəzzədə sionist rejimi etosniye və canqi cinoyətonku Amerkə rejimi himoyəku tənğidış kardə və votışe: Amerkəvıjon Ğəzzə milləti ğətli-am və çəy dəvomi vey muhimmə məsul bə hisob omeydən.
Im vindemonədə siyosi məxsusə koonədə İron İslom Respublika xarıci vəziri ali mışovir ijən bə İron və Tırkiyə dust və çokə rabitəon işorə və təkidış kardə: məntəğədə stabiləti icod kardeyədə İron və Tırkiyə rol vey muhimme iyən bə Suriyə ərazi təmamiyyət və milli hakımiyət ehtırom noey, İron və Tırkiyə mıştərəkə hədəfonku be və Tırkiyə və Suriyə rabitəon bəji kardeyro, İron ıştə həmə cəhdon əncom bədoy.
