Statistikəon çokonə çı Trampi oşkoə duyon bərməlo kardedə?

Tramp çe AİŞ-on bə Hormuzi tanqə nəzorət kardey və nəğliyyoti normalə ğaydədə çın lukiku dəvardey iddiyoş kardəbe.

Bın miyono İron çı Trampi bo canqtələbə hərəkəton xoto çın luki hələm həm də bastə beyış bəyon kardə və Vaşinqton bə nodırıstə rəvoyətiş çanq ğandə.

"Wall Street Journal" hisobot Hormuzi tanqədə dıyo nəğliyyoti həcminin normalə mığdori tosə dadə i bəkam bey nışon doydə.

Eskalasiya bino bey bənav çın lukiku har ruj 130-sə ziyodə kəşti dəvardedəbe,çoşanbə şəvi çın lukiku cəmi 14 kəşti dəvardə ki,çımonku həm11 qılə kəşti çe İroni rəhbərəti jiyədə bıə marşrutış səçın kardə.

Avqustə manqədə bə ğeyd seyə bıə dəvardəcoku 166 qılə kəştiku cəmi fəğət 2 qılə kəşti çe AİŞ-on himoyə jiyədə çe marşrutiku istifodəş kardə.

Bın miyono,çe muhoribə riski sahədə mıkofoti dərəcəon çe 0,25 fayiziku bə 10 fayizi rost bıə holədə,bə xarcon de şiddəti rost bey səbəb bıə.

Aramko sər direktori həmçinin 2,6 milyard barel nati çe qlobal tədaruki devrəku xaric beyış bəyon kardə. Analitikon votedən ki,rəğəmon bənə Trampi iddiyo kardə qıləy mıvəğğəti behron ni,dəvominə xələli bey nışon doydə.

İroni xarici koon vəzir Seyd Əbbos Ərağçi bə Amerkə rəsmiyon xəbərdorəti kardəşe ki,duyə məlumot bə vey dıjdə duyə hisobon səbəb bey bəzıne.