Çı Britaniya farsi zıvonə mediyaon deşmənçiyə bərnoməon iyən İroni etıroz.
Londonədə İroni səfarətxonə qıləy bəyoniyədə Beritaniyaədə bıə farsi zıvonə mediyaon fəaliyəti İronədə dəvardə rujon fitnəon otəşi rost karde xoto məhkumış kardə.
Bə İrna raporti əsos həminə etıroz bəyoniyədə ki bə Britaniya mediyaon nəzorət əkə təşkilat vığandə bəy təsdiğ be: de təəsufi Beritaniya mediyaon İronədə dəvardə rujon mıddətədə bıə qədə iğtişoşon cərəyonədə harçiku vey cəmaəti bə dave iyən silohinə etırazon təhrik kardən ki notəmizə siyasəton iyən səhvə xəbəon muntəşir karde kənoədə qıləy ğeyri professenalə hərəkət hisob bıdə.
Londonədə İroni səfir Həmid Bəidinejad həm tojədən votışe: dəvardə rujon İronədə qədə mərəşuləon sabitış kardə ki İroni umum cəmaəton qıləy holədə ki iğtisodi və iştimai cəhətiku problemonışon heste əmmo məmlekəti noəmn karde iyən daveon pidə nin.
Dəvarde haftə 5 şambə rujiku İroni bəzi şəhronədə cəmaət de aksiyaon bəzi puliyə muəssisəon vəziyəti mıəyyən nıbey, ərzağon boho bey ijən dıvləti nəzorəti zəifəti xoto etırozon bino kardən ki bəzi fitnəkoron sue-istifodə karde zəminəon bois be.
Amerkə və siyonist rejimi rəsmi şəxson ijən xarıciyə mediyaon ım vəziyətiku istifodə karde sayədə iğtisodi etıroz aksiyaon bə siyasi iğtişoşon tərəf bardən.
Çımiku bə nav, 2009 sorədə həm İronədə prezidenti səçıni nooromtətion bəpeştə Amerkə, İnqiltərə və vabəstə bıə onsoron ıştə həmmə imkanaton vasitə bə İroni islamiyə nizomi zərbə varid karde fikədə bıən ki İroni millət çəvon fitnəon xonsa kardən
