Laricani: Trampi siyasəton Amerkə be abruçəti bois bəbe.
İroni islami şura məclesi sədr çı Amerkə prezidentəti siyasətonış be abruçəti amil zınəş be və votışe: Amerkə millət qıləy ıştəni piyə şəxsiyəti vədə qiriftor bıən.
Əli Laricani ımruj, ətomiyə təvafuği barədə Amerkə tojə ğəroli çı Trumpi diplomatik şo hisob kardə ki 1 sori mıddətdə dəvomış be.
Laricani votışe: Trump i ruj İ Bıə Milləton Təşkilatdə dınyo rəhbəron tono Şimali Koreya məhv kardeku kəp jedə və co ruj ıştə sıxənon əvəz karde bəpeştə ım kişvəri prezidentəti qıləy ehtırominə şəxs elan kardə ki bəbe dəy muzakirə bıbu.
İroni islamiyə şura məclesi rəis əlovəş kardə: Trump i ruj Avropa i bemoni ticarət sahədə təhdid kardə və co ruj bo ıştə həmpeymononro ğəroli əvəz kardə ijən i ruj Suriyəku xaric bey bardə kəp jedə əmmo peşo çı Suriyə bəzi məntəğəon bombardemon bəkarde, ım yəni Trump ıştənış pidə və siyasət sahədə qiriftor mandəy.
İroni islamiyə şura parlamenti xarıci siyasət və milli əmniyyət kamissiya rəis Əlaeddin Burucerdi həm elan kardə ki Trump deştə ım ğərol beynəl xalğiyə ğanuni məsxərəş kardə iyən sabit kardə ki dınyoədə Amerkə xatir cəm mande imkonış ni.
Əv təsdiğ kardə ki Trumpi ım ğərol bə Amerkə zərər-ziyane və ısət Avropa i bemon iyən ım təvafuği imzo əkəyon qıləy yolə omtovoni vədən.
Burucerdi çı İroni rəketiyə bərnomə barədə həm ijən İroni siyasəton sabit və zumand zınəş be və təsdiğ kardə ki İroni məclesədə bo rəketiyə bərnoməonro bodcə nəzərdə qəte bəbe.
Çı İroni islamiyə şura məclesi əmniyyət kamissiya uzv Seyed Husein Nəğəvi Huseini həm Trumpi ğəroli elan bey bəpeştə omə şərayetiro çı İroni ali rəsmi şəxson miyono vəhdət və i bemoni stajış nıbıə vəziyətdə elan kardə.
Əv votışe: beynəl xalğ iştimaiyət çı Trumpi ım ğəroli peştədə ni və Amerkə oğo bıbu ki jıqonə hərəkəton İroni milləti dılədə hiç karde ni bəzne problemi icod ni bəkay.
Amerkə prezident Donald Trump zinə şəv İron və 5+1 qrupi miyono ətomiyə təvafuğ ki İ bıə Milləton Təşkilati səmtiku təsdiğ bıə be benəticə elan kardə iyən həminə muğaviləku ım kişvəri xaric bey fərmoni imzo kardə.
Trump ıştə voteonədə de beəsosə ittihamon bəyon karde ijən İroni bə məntəğə kişvəron daxeliyə məsələon dəxolət karde mıttəhəm kardə iyən iddioş kardə ki Tehron de ətomiyə təvafuği bə ətomiyə siloh dast peydo kardedə.
Ətomiyə təvafuğiku Amerkə i tərəfiyə hərəkət iyən çəyku xaric bey qıləy holədə vaği bəy ki ta ım zəmon muxtəlifə kişvəron ıştə himoyətışon ım təvafuğnoməku elan kardən.
Bə raporton əsos, Benyamin Netanyahu, Ərəbıston iyən bəzi de Amerka və siyonist rejimi həmpeymonon çı Amerkə prezidenti ım ğəroli elan bey bəpeştə Sipiyə Kəku ıştə roziyəti nışoşon do.
