Cəmal Xaşeğci qim bey xoto Tırkiyədə etırozinə aksiya.

Tırkiyədə "Ərəb Jurnaliston cəmiyət" Ərəbıstonıjə qim bıə jurnalisti ozodəti tələb kardən.

Bə Telerədio aqentiyəti raporti əsos ım cəmyəti rəis Turan Kişlakci zinə Ankaraədə çı Ərəbistoni konsuləti nezi bıə aksiyaədə ım Səudiyə jurnalisti ozod bey tələbış kardə.

Kişlakci de Cəmal Xaşeğci sərneveştiku niqəronion nışo doe təkid kardeşe, ım cəmyəti ozvon və co jurnaliston, Səudiyə jurnalisti vəziyəti təyin bey tələb kardən.

Cəmal Xaşğci ki Vaşenqton Posti Amerkəvıjə rujnomədə siyosiyə sər redaktor be, dəvardə seşənbəku və Ankaraədə bə Ərəbistoni konsuləti varid bey bəpeştə qim be.

Bə çəy pəvandi votəyon əsos ki Tırkiyə şahrvane, Xaşeğci bo ıştə izdivoci idoriyə prosessi əncom doe bə konsuləti şə be əmmo hıç vaxt konsulətiku xaric bə ni.

Xaşeğci Ərəbistoni Vəliəhd Muhəmməd Bin Səlman və Yəmənədə bıə Ərəbistoni nizomiyə mıdoxiləku tənğidon ğeyd karde bəpeştə ım kişvəri əmniyyəti hərbion tərəfiku dəstqir bey tarsi xoto Milodiyə dəvardə sori bə Ərəbistoni tərk kardey məcbur be.