Xaşeğci məsələ barədə Tırkiyə və Ərəbistoni miyono ciddiyə bıhranon.

Tırkiyə prezident votışe, əqə Ərəbiston bə Ale-Səud rejimi tənğid əkə jurnalist Cəmal Xaşeğci dosye həl karde meylış ni, Tırkiyə ım dosye huğuği prossesi bino bıkə.

Bə Ruyterz raporti əsos, Rəcəb Təyyeb Ərdoğan zinə mıxbıron qırd bıə iclosədə təkidış kardə, Cəmal Xaşeğci ğətli dosye barədə Ərəbistoni tərəfo huğuği prossesi mıəttəl karde Tırkiyə nəzəku ğəbul bənin ni və əmə ım məsələ barədə bəştə ədliyə sistemi əməl bəkamon.

Tırkiyə prezident təsdiğış karde, Cəmal Xaşeğci İstanbulədə bə ğətl rəsə və Tırkiyə ım ğətli dosye barədə təhğiğ karde xoto hozzıətışe.

Ərdoğan çand ruj çimiku bənav həm bə Ərəbiston təklif doəş be Ale-Səud rejim tənğidəkə jurnalisti dosyeədə şək vardə bıə kəson mıhokimə Tırkiyədə əncom bıbu, əmmo Ərəbiston ım təklifi rədd və elanış kardə, Ərəbistonədə ım ğətli amilon mıhokimə beben. 

Ale-Səud rejim 3 haftə bəpeştə, Oktiyabri 20 de pısoxtə bıə dastani, Tırkiyə Stanbulədə bıə Ərəbistoni konsuləti vırədə Xaşeğci ğətli məsuliyəti ğəbul və iddio kardeşe Xaşeğci de İstanbulədə Ərəbistoni konsuləti kadron dave vositə kıştə bəy.

Ale-Səud rejimi rəsmi şəxson bəyonat qıle holədəy be ki ım rejimiku tənğid əkə jurnalist Cəmal Xaşeğci cənozə ta ım zəmon peydo bə ni.